İlqar Kamil

Səni elə sevəcəm ki

Səni elə sevəcəm ki

Həsrətimdən öləcəksən

Səni elə sevəcəm ki

Durmayacaq ayaqların başqa yerdə

Heç sonunu düşünmədən

ürəyimə gələcəksən

Səni elə sevəcəm ki...

səni elə sevəcəm ki

oğrun-oğrun

gizli-gizli

səssiz

sözlü...

Səni elə sevəcəm ki

Xumar gözlüm!

Həyat adlı kitabından

Keçmişini siləcəksən

Güləcəksən...

Səni elə sevəcəm ki

İnan mənə

Xoşbəxtlikdən qanad çalıb

Səmalarda süzəcəksən

Nazlı-nazlı gəzəcəksən həyatımın bağçasında...

Səni elə sevəcəm ki

Həsrətimin saçaqların hörmək üçün,

Səni elə sevəcəm ki

sevgimizin hüdudların görmək üçün

Addım başı ürəyimi üzəcəksən...

Əzəcəksən...

Səni elə sevəcəm ki

Sevdiyimi biləcəksən

Güləcəksən...

Güləcəksən...

Səni elə sevəcəm ki

O incəcik zərif qəlbin dözməyəcək bu sevgiyə

Səni elə sevəcəm ki

Sevincindən öləcəksən...

Unuda bilmədim

Son baxışını heç unuda bilmədim ki

Gözlərin bir az islaq idi

Qan da qoymuşdu azacıq...

Baxışların çox aciz idi inan

Çox məcbur

elə baxırdı ki yazıq-yazıq...

Son baxışını heç unuda bilmədim ki

Çöhrəndə qap-qara bulud

Kirpiklərində damcı-damcı nəm var idi

Üzündə yalançı bir şadyanalıq,

İçində vaxtsız ölümçün qurulmuş matəm var idi

Son gedişini heç unuda bilmədim ki, mələyim!

Eyni ilə canlı efirin lent yazısı kimidi

hər dəfə - efirimizə siz də bağlanın

- deyə səslənəndə aparıcı

Ürəyim dəstəyə doğru atılsa da

Ağlım donuq-donuq geri qayıdır

Axı bu

Bir lent yazısıdır...

Yadındamı

sən səhər-səhər

sabah-sabah tərk etmişdin məni

şübhə-şübhə, sual-sual

Mənsə daha çox gecələr izləyirəm o son gedişi

Kadr- kadr, Detal-detal...

Ən çox diqqətim 43 –cü dəqiqədə

Son kəs əlini yellədiyin anda olur

Və qəzavətim budur ki:

Tərk edən, mələk kimi məsumdu

Günah həmişə qalanda olur...

Son gedişini heç unuda bilmədim ki

Dəli şeytan bir bıçaq götürüb

Yolunu kəsim zorla

mane olum deyirdi

Səninsə -iki parçaya bölünmüşdü varlığın

Ağlın gedim

Ürəyin qalım deyirdi...

Və sən ağlın deyəni tərcih etdin

Getdin

Və mən

son baxışını heç unuda bilmədim ki...

• Küçə iti teatr səhnəsində - Video
• Məşhur bəstəkar vəfat etdi
• “Məhəmməd Tağı Sidqi - 170” adlı kitab sərgisi açılıb