Tanınmış yazıçı Orxan Pamukun 2008-ci ildə işıq üzü görən və ədəbi mühitdə böyük əks-səda doğuran “Məsumiyyət muzeyi” romanı, eyniadlı serialın ekranlara çıxması ilə yenidən gündəmə gəlib.

Kulis.az xəbər verir ki, serialın rəqəmsal platformada yayımlanması nəinki romana olan marağı artırıb, həm də əsər əsasında yaradılmış real Məsumiyyət Muzeyini yenidən diqqət mərkəzinə çevirib.

Kamal və Füsunun patoloji həddə çatmış sevgisi ətrafında qurulan hekayə oxucunu reallıqla xəyal dünyası arasında səyahətə çıxararkən, əsərdəki sırğa, siqaret kötüyü, ayaqqabı, qəzet və stəkan kimi gündəlik əşyalar 2012-ci ildə açılan muzeydə fiziki eksponatlara çevrilib.

Muzey fəaliyyətə başladığı gündən bəri maraq dairəsində olsa da, serialın anonsundan sonra ziyarətçi sayında kəskin artım müşahidə olunur.

Muzeyin yerləşdiyi ərazidə xüsusilə xarici turistlərin “serial başlamazdan əvvəl bura mütləq baxmalıyıq” dediyini eşitmək mümkündür.

Muzey əməkdaşlarının bildirdiyinə görə, son 15 gündə ziyarətçi axını nəzərəçarpacaq dərəcədə çoxalıb və serial nümayiş olunduqdan sonra bu göstəricinin daha da yüksələcəyi gözlənilir.

Artan maraq təkcə muzeylə məhdudlaşmayıb, romanın satışları da yeni rekorda imza atıb. “Yapı Kredi Yayınları” tərəfindən çap olunan kitab artıq 45-ci nəşri ilə 700 minlik tiraja çatıb. Sosial şəbəkələrdə roman və serialla bağlı paylaşımların sayı sürətlə artdığı bir vaxtda, “Hepsiburada” ticarət platformasının açıqlamasına görə, “Məsumiyyət muzeyi”nin satışları əvvəlki həftəyə nisbətən 885 faiz artıb. Tələb o qədər yüksək olub ki, platformadakı mövcud ehtiyat qısa müddətdə tükənib.

Serialın yayım tarixinin elanından sonrakı beş həftə ərzində isə satışlarda 406 faiz artım qeydə alınıb.

Görünən odur ki, “Məsumiyyət muzeyi” həm ədəbiyyat, həm də vizual mədəniyyət sahəsində yenidən böyük bir fenomenə çevrilir.

• Rüstəm Dastanoğlu xalqın ağrılarına biganə qalmayan nasirdir - Nağdəli Zamanov
• Azərbaycan xalçaçıları “Tərəqqi” medalı ilə təltif edildi
• Vətən yaraları - Mir Cəlalın hekayəsi