"Azərbaycan kinosuna dövlət dəstəyi genişlənir, istehsal xərclərinin 40%-dək hissəsi geri ödəniləcək".

Kulis.az APA-ya istinadən xəbər verir ki, bunu Azərbaycan Respublikası Kino Agentliyinin (ARKA) baş direktoru Rəşad Əzizov 2025-ci il tarixində Kino Agentliyi tərəfindən "Filmlərin istehsalı üçün çəkilmiş xərclərin qismən geri ödənilməsi" ilə bağlı media konfransında deyib.

Rəşad Əzizov qeyd edib ki, 2023-2025-ci illər ərzində bu istiqamətdə görülmüş işlər, hüquqi sənədlər və tətbiq olunacaq mexanizmlər ictimaiyyətə təqdim olunub.

ARKA-nın baş direktoru onu da bildirib ki, Azərbaycan Respublikası Prezidentinin 29 may 2025-ci il tarixli 610 nömrəli Sərəncamı və Nazirlər Kabinetinin 4 iyul 2025-ci il tarixli 196 nömrəli Qərarı ilə film istehsalına dövlət dəstəyi mexanizmi təsdiqlənib:

"Yeni sistemə əsasən, Azərbaycan ərazisində istehsal edilən filmlər üzrə çəkilmiş xərclərin 40%-ə qədər hissəsi dövlət tərəfindən geri ödəniləcək. Azərbaycanda çəkilən filmlərin xərclərinin 25%-i geri ödəniləcək . Əlavə mədəniyyət meyarlarına uyğunluq əsasında 15%-ə qədər əlavə ödəniş edilib. Qismən geriödəmə üçün müraciətlər yalnız elektron formada - filmcommission.gov.az portalı vasitəsilə qəbul olunur".

R. Əzizov həmçinin onu da qeyd edib ki, bu təşəbbüs ölkədə film istehsalına investisiyaları artırmaq, beynəlxalq prodüserləri cəlb etmək və yerli kino sənayesinin inkişafını sürətləndirmək məqsədi daşıyır.

O bildirib ki, Azərbaycan ərazisində xarici filmlərin istehsalı uzun illərdir aparılır və bu sahədə bir sıra böyük layihələr, o cümlədən seriallar həyata keçirilib.

Rəşad Əzizovun sözlərinə görə, hazırda bu istiqamətdə yeni mərhələyə qədəm qoyulur: “Əminik ki, yaxın gələcəkdə istehsalçı şirkətlərin sayı artacaq. İnkişaf etmiş ölkələrin kino sənayesindən maraq daha da yüksələcək. Biz bu sahədə yerli özəl şirkətlərlə sıx əməkdaşlıq edirik və artıq bir neçə şirkət ixtisaslaşıb”.

Agentlik rəhbəri əlavə edib ki, qarşıya insan kapitalının formalaşdırılması ilə bağlı konkret vəzifələr qoyulub. Onun sözlərinə görə, qaydalar bütün şirkətlər üçün keçərlidir və bu təşəbbüs nəticəsində ölkə daxilində 7-8 şirkətin yaxşı nəticə göstərəcəyi gözlənilir:

“Hədəfimiz odur ki, növbəti 3-5 il ərzində ölkədə çəkilən filmlərin miqyası daha da genişlənsin”.

• Kazım Koyuncu haqqında çəkilən filmdə Cem Yılmaz surprizi
• "Boyhood"un müəllifindən yeni film
• Hollivudda süni intellekt qalmaqalı - Saxta "aktrisa" baş rola çəkilir