Azərbaycan Dövlət “Yuğ” Teatrı Türkiyənin Konya şəhərində keçirilən XIV “Min nəfəs, bir səs” beynəlxalq teatr festivalında iştirak edib.

Kulis.az xəbər verir ki, teatr festivalda “Kloun Z” tamaşasını təqdim edib. Matey Vişnekin “Qoca koun tələb olunur” pyesi əsasında hazırlanmış tamaşanın quruluşçu rejissoru Mikayıl Mikayılov, quruluşçu rəssamı Umay Həsənovadır.

Feeriya-makabr janrında hazırlanmış tamaşada pyesdən fərqli olaraq, vakansiya üçün müraciət edən klounlar qadınlardır. Səhnə əsərində teatrın sənətçiləri Natəvan Qeybani (Sarı), Zümrüd Qasımova (Qırmızı) və Təranə Ocaqverdiyeva (Yaşıl) çıxış ediblər.

“Min nəfəs, bir səs” Türkiyənin nüfuzlu teatr festivallarındandır. Artıq 14-cü dəfə keçirilən festival bu il 20-30 may tarixlərinə təsadüf edir. Festivalda “Yuğ” teatrı ilə yanaşı, Kosova Sənət Teatrı, Qaqauz Milli Teatrı, Qazaxıstan Dövlət Kukla Teatrı, Qazaxıstan Nur-Sultan Akimat Jastar teatrı, Hollandiya NY Prodakşn, İstanbul Dövlət Teatrı və Van Dövlət Teatrı da iştirak edir. Tamaşa kiminsə verdiyi elana görə iş tapmaq ümidi ilə gəlmiş üç kloun haqqındadır. İş axtaran üç qoca kloun müsahibəyə gəldikləri gözləmə otağında rastlaşırlar. Onlar keçmişi yada salır, zarafatlaşır, kədərlənir, arzularla ovunurlar!.. Bu görüşün sevinci uzun sürmür. Çünki qoca kloun rolu üçün yalnız bir vakansiya təklif olunur. Tədricən üç köhnə dost müasir dövrün faciəvi döyüşçülərinə çevrilirlər. Hər biri var qüvvəsi ilə sağ qalmağa çalışır və özləri üçün illüziya yaradırlar ki, onları “böyük klounada sənətindən” qalan dəyərləri xilas etmək üçün çağırıblar.

Qoca klounlar sübut etməyə çalışır ki, hələ hər şey bitməyib, hələ də bu dünyada kiməsə gərəkdirlər.

• Selin Dion Paris səhnəsinə qayıdır - 9 ildən sonra
• Roş-Ha-Şana təntənəsi, Şuşa qalasının vitrajı, qədim Tövrat nüsxələri - Dağ yəhudilərinin sinaqoqundan reportaj
• "Düşmənlərin öhdəsindən gəlməyin yolu sərt təzyiq siyasətidir..." - Məşhur alman yazıçının Stalinlə müsahibəsi