İnqilab şairləri bir yaz günü öldülər - Rəvan Cavidin yeni şeirləri

İnqilab şairləri bir yaz günü öldülər - Rəvan Cavidin yeni şeirləri
19 yanvar 2025
# 09:00

Bu gün gənc şair Rəvan Cavidin doğum günüdür.

Kulis.az şairi doğum günü münasibətilə təbrik edir və yeni şeirlərini təqdim edir.

***

yalanının xiffəti gör nə boyda dağ olub,
dağ yarılıb, div çıxıb, səsi ömrə çığ olub,
getmisən, dönməmisən - bu da ayrılıq olub,
axtar məni, gör məni, eşit məni, bil məni...

rüzgara de, yubansın, saçlarında əylənsin,
qumdan otaqlarım var, fəqirə rəhm eyləsin,
yolunu azan aşiq ünvanını neyləsin?
axtar məni, gör məni, eşit məni, bil məni...

köz üstündə yeridim, ağladım, odlanmadım,
qafil ovçu gecikdi, gizləndim, ovlanmadım,
sənə xatir yaşadım, tək qaldım, soylanmadım,
axtar məni, gör məni, eşit məni, bil məni...

and içdim qış ömrümün buzuna, sazağına,
zəmhərir gecəsinə, gün doğmayan çağına,
getdiyin yerdən qayıt, pıçılda qulağıma:
tapdım səni, gördünmü, eşitdinmi, bildinmi?!

***

Qaldırdım başımı –
buludlar, səma, ənginlik və sair.
Sağa baxdım –
mavilik, dalğalar, qızıl qürub –
hər şey dənizə dair.

Sola çevirdim başımı –
pəncərəsi açıq evlər,
və küləklərlə rəqs edən bəyaz pərdələr,
budaqlarda sərçələr,
adam boyda divlər.
Yerə baxdım –
torpaq,
həmənki köhnə nəğmə,
min illərin ağısı,
min illərin ağrısı,
sonsuz yalnızlığın əbədi yurdu,
simurq qonmuş ağacın
budaqları qurudu.

***

Bu pinti sahillərin qosqoca Mərmərəsi,
Tutqun dekabr günü, bir azdan yağış yağar.
Həmənki yelləncəkdə gözləyirəm baharı,
Sən gələrsən, yaz gələr,
Yaz gələr, günəş çıxar.
Gedərsən, qış qayıdar,
Buz səltənətin qurar.

Həmənki yelləncəkdə ayrılıram səninlə,
Tutqun dekabr günü, bir azdan yağış yağar.
Dəniz lal-dinməz qalıb, sahil qaranlıq və pus,
Gözləyirəm, gələrsən,
Sən gələrsən, dağılar bu səssizlik, bu kabus.

Qutuda son siqaret, şüşə dibindən çaxır,
Tutqun dekabr günü, bir azdan yağış yağar,
Bu gecəni qoruyan dili nəğməli sərxoş,
Ona qoşulub mən də dənizə daş ataram,
Bir ağacın dibində səhərədək yataram.

***

İnqilab nəğmələri bəstələmək istədim,
Fəhlələrin dilində ağı kimi oxundu.
Bayraqların üstünə qırmızı ulduz tikdim,
Masmavi parçalara sarı ulduz toxundu.

Həbsxana divarına yazmışdılar o gecə,
Yaşasın inqilablar! Yaşasın oktyabr!
Aldatmışdılar bizi, oktyabr deyildi,
Bir yanvar gecəsində biz etdik inqilabı.

Özü yeyib bitirdi devrim oğullarını,
Yarısı ipdə qaldı, yarısı mərmi altda.
İnqilab şairləri bir yaz günü öldülər,
Qələbə paradının başladığı saatda.

# 3647 dəfə oxunub

Oxşar xəbərlər

“Faşizm qadın və kişi arasındakı münasibətdə başlayır…” - İngeborq Baxman

“Faşizm qadın və kişi arasındakı münasibətdə başlayır…” - İngeborq Baxman

18:10 17 oktyabr 2025
"Yazıçı aradan çəkilərsə... " - Mixail Baxtinin forma və ideologiyaya baxışı necə idi?

"Yazıçı aradan çəkilərsə... " - Mixail Baxtinin forma və ideologiyaya baxışı necə idi?

15:20 17 oktyabr 2025
"Fortepianonun şairi" adlandırılan bəstəkar - Şopen  Jorj Sanddan niyə ayrılmışdı?

"Fortepianonun şairi" adlandırılan bəstəkar - Şopen Jorj Sanddan niyə ayrılmışdı?

15:10 17 oktyabr 2025
Dəliliyin və seksuallığın tarixindən kitablar  yazan homoseksual filosof - Mişel Fuko kim idi?

Dəliliyin və seksuallığın tarixindən kitablar yazan homoseksual filosof - Mişel Fuko kim idi?

14:30 15 oktyabr 2025
"Bu savaşda hər yazıçı öz atasını “öldürür” - Harold Blumun ən böyük dərsi nə idi?

"Bu savaşda hər yazıçı öz atasını “öldürür” - Harold Blumun ən böyük dərsi nə idi?

17:00 14 oktyabr 2025
Cüzeppe Verdi  hansı operasından sonra İtaliyanın Milli Qəhrəmanı  kimi tanınıb?

Cüzeppe Verdi hansı operasından sonra İtaliyanın Milli Qəhrəmanı kimi tanınıb?

15:38 10 oktyabr 2025
#
#
Ana səhifə Yazarlar Bütün xəbərlər