Azərbaycan Dövlət Kukla Teatrı aktrisa Nərmin Əhmədovanın teatrın direktoru Rəşad Əhmədzadə ilə bağlı mülki məhkəmə prosessi haqqında açıqlama yayıb.

Kulis.az xəbər verir ki, yazıda məhkəmənin hələ tam yekunlaşmadığı bildirilib:

"Qeyd olunan məsələ ilə bağlı Bakı Apellyasiya Məhkəməsi hakim Namiq Cəfərovun sədrliyi ilə 2 mart 2026-cı il tarixində məhkəmə iclası keçirilib, Səbail Rayon Məhkəməsi tərəfindən qəbul edilən qərar qüvvədə saxlanılıb. Qərardan narazı tərəf kimi Azərbaycan Dövlət Kukla Teatrı yuxarı instansiya məhkəməsi olan Azərbaycan Respublikasının Ali Məhkəməsinə müraciət edəcək. Ali Məhkəmənin qərarına uyğun olaraq bundan sonrakı addımlar müəyyən ediləcəkdir.

Nərmin Əhmədova ilə bağlı direktor tərəfindən imzalanmış əmrin qüvvədən düşməsi və ləğvi məsələsinə gəlincə bildiririk ki, bu istiqamətdə hər hansı yekun qərar qəbul edilməyib, məsələ Ali Məhkəməyə təqdim olunacaq. Ali Məhkəmənin qərarına uyğun olaraq müvafiq hüquqi addımlar atılacaqdır.

Qarşı tərəf yekun qərarı gözləmədən mediaya açıqlama verib. Bu, onun vətəndaş mövqeyidir və buna hər hansı etirazımız yoxdur. Amma bu çaşqınlıq yaradır".

Qeyd edək ki, Rəşad Əhmədzadənin həyat yoldaşı olmuş teatrın quruluşçu rejissoru Səidə Haqverdiyeva bir müddət əvvəl ona qarşı təzyiqlər olduğunu bildirərək boşanma qərarı verdiyini açıqlamışdı. Onun iddiasına görə, teatrda ailəsinə qarşı təzyiqlər edən şəxslər olub.

Xatırladaq ki, aktrisa Nərmin Əhmədova ilə əvvəl Abdulla Şaiq adına Azərbaycan Dövlət Kukla Teatrı arasındakı mülki məhkəmə çəkişməsinin başa çatdığı qeyd edilmişdi. Aktrisa teatr direktorunun ona verdiyi şiddətli töhmətlə bağlı məhkəməyə üz tutub və onun aradan qaldırılmasını istəyib.

• “İliada” dastanına aid nadir papirus parçası tapıldı
• Abbasqulu ağa Bakıxanovun doğulduğu ev uçdu
• Məşhur aktyor vəfat etdi