M.F.Axundzadə adına Azərbaycan Milli Kitabxanasında Azərbaycan dilində rəqəmsal Qazax ədəbiyyatı kitabxanasının təqdimat mərasimi keçirilib.

Kulis.az xəbər verir ki, təqdimat Azərbaycan-Qazaxıstan diplomatik münasibətlərin 30-cu ildönümünə həsr olunmuş tədbirlər çərçivəsində baş tutub.

Tədbirdə çıxış edən Beynəlxalq Türk Mədəniyyəti və İrsi Fondunun prezidenti Günay Əfəndiyeva Azərbaycan-Qazaxıstan arasında mövcud olan münasibətlərdən danışıb: “Bu il Beynəlxalq Türk Mədəniyyəti və İrsi Fondu üçün əlamətdar ildir. Çünki Fonda üzv dövlətlərin əksəri cari ildə diplomatik münasibətlərin qurulmasının 30-cu il dönümünü yüksək səviyyədə qeyd edirlər. Bu otuz il ərzində qardaş ölkələr arasındakı siyasi, ictimai, mədəni əlaqələr böyük və şərəfli yol keçmişdir. Bu qarşılıqlı münasibətlər ən müxtəlif sahələrdə bu gün də davam edir. İlk növbədə dövlət başçıları səviyyəsində, qurumlar səviyyəsində və əlbəttə, xalqlar arasında. Biz xalqlarımızın qarşılıqlı dəstəyini 30 ildə daim müşahidə etmişik. Məsələn, Azərbaycanın 44 günlük Vətən Müharibəsi zamanı, yaxud bu ilin əvvəlində baş verən Qazaxıstandakı son hadisələr zamanı.

Bu gün qazax ədəbiyyatının elektron kitabxanası Azərbaycan Milli Kitabxanası vasitəsi ilə bütün dünyaya təqdim edilir. Bu mənbə əsasında Azərbaycan və dünya oxucuları qazax ədəbiyyatını daha yaxından tanıyacaq və nəticədə ədəbi körpülər, mədəni sütunlar möhkəmlənəcəkdir. Arzu edirəm ki, bu layihə digər Türk dövlətləri ilə davam etsin.

Beynəlxalq Türk Mədəniyyəti və İrsi Fondu da mədəni layihələrə daim dəstək verir. Ötən il Fond tərəfindən İspaniyada Abayın markası nəşr olundu və böyük şairin ad günündə Qazaxıstanın Azərbaycandakı səfirliyi ilə birgə ictimaiyyətin diqqətinə təqdim edildi. Bu o deməkdir ki, Avropa Abay yaradıcılığı ilə, Qazax adət ənənələri ilə və bütövlükdə Türk Dünyasının mədəniyyəti ilə daha yaxından tanış olacaq. Fond iki ildir ki, Abayın həyat və yaradıcılığı ilə bağlı əhatəli bir nəşri çapa hazırlayır. Həmin kitab bu il dahi şairin ad günündə – 10 avqustda oxucuların ixtiyarına veriləcək.

Eyni zamanda təşkilatımız “Üç ozan bir arada” adlı böyük bir ədəbi layihəni həyata keçirir. Layihə 3 böyük şəxsiyyətin: Yunus Əmrənin, Aşıq Ələsgərin və Cambul Cabayevin həyat və yaradıcılığını ehtiva edir.”

Tədbirdə Qazaxıstanın Azərbaycandakı səfiri Serjan Abdıkarimov, Azərbaycan Milli Kitabxanasının direktoru, professor Kərim Tahirov, Azərbaycan Yazıçılar Birliyinin birinci katibi, Xalq yazıçısı Çingiz Abdullayev, Bakı Slavyan Universitetinin professoru Nizami Məmmədov-Tağısoy, Mahmud Kaşqari adına Uluslararası Fondun sədri, yazıçı, şair Elxan Zal Qaraxanlı, BDU Türkologiya kafedrasının müdiri, professor Ramiz Əskər, BDU Türkologiya kafedrasının professoru Firuzə Ağayeva və başqaları çıxış edərək, Azərbaycan və Qazaxıstan arasında mədəniyyət sahəsində əlaqələrindən söz açıblar.

• "Beli bükük ağacın əlinə əsa olar kəsilmiş qolu..." - Günün şeiri
• Moris Leblanın ikonik personajı - Arsen Lüpen kim idi?
• Kurt Şnayderin psixopat təsnifatı - Siyahıda kimlər var?