Azərbaycan media nümayəndələri “Silk Road Samarkand” beynəlxalq turizm mərkəzinin ərazisində yerləşən “Əbədi şəhər” mədəniyyət məkanında olublar.
APA-nın Özbəkistana ezam olunmuş müxbiri xəbər verir ki, jurnalistlərə “Əbədi şəhər”in konsepsiyası və burada Özbəkistanın müxtəlif regionlarının tarixi və mədəni xüsusiyyətlərinin təqdim olunması barədə məlumat verilib.
Bildirilib ki, “Əbədi şəhər” ölkənin zəngin etnoqrafik irsini, milli adət-ənənələrini, sənətkarlığını və mətbəxini vahid məkanda təqdim edən mədəni-turizm layihəsidir.
Burada ənənəvi sənətkarlıq növləri ilə məşğul olan ustaların fəaliyyəti, milli geyimlər, dekorativ sənət nümunələri və müxtəlif bölgələrə xas mədəni elementlər nümayiş etdirilir.
Jurnalistlər həmçinin milli mətbəx nümunələri və yerli sənətkarlıq məhsulları ilə tanış olublar. Qeyd olunub ki, məkanın yaradılması həm turistlərə Özbəkistanın mədəni müxtəlifliyini yaxından tanıtmağa, həm də ənənəvi sənət və sənətkarlıq növlərinin qorunmasına imkan yaradır.
Media nümayəndələri Özbəkistana media tur çərçivəsində həmçinin Səmərqəndin ən məşhur tarixi-mədəni abidələrindən biri olan Əmir Teymurun məqbərəsini ziyarət ediblər.
APA xəbər verir ki, media nümayəndələri Teymurilər sülaləsinin məqbərəsi hesab olunan abidənin tarixi, memarlıq xüsusiyyətləri və Səmərqəndin tarixi simasının formalaşmasındakı rolu ilə tanış olublar. UNESCO da Gur-e-Amir ansamblını Səmərqəndin əsas tarixi abidələri sırasında qeyd edir.
Jurnalistlərə bildirilib ki, məqbərə Teymurilər dövrünün memarlığının ən diqqətçəkən nümunələrindən biridir. Böyük günbəzi, mavi kaşılarla işlənmiş fasadı, zəngin ornamentləri və daxili bəzəkləri ilə seçilən məqbərə bu gün Səmərqəndin əsas turizm məkanlarından biridir.
Media nümayəndələri məqbərənin daxilində Əmir Teymurun məzarını, onun üzərində yerləşən məşhur nefrit qəbirdaşını və Teymurilər sülaləsinin digər nümayəndələrinin məzarlarını ziyarət ediblər. Burada Əmir Teymurla yanaşı, onun ailə üzvlərinin və Teymurilər sülaləsinin digər tanınmış nümayəndələrinin dəfn olunduğu bildirilib.
Jurnalistlərə məlumat verilib ki, Əmir Teymur 1405-ci ildə vəfat etdikdən sonra Səmərqəndə gətirilərək nəvəsi Məhəmməd Sultanın mədrəsəsinin dəfn kompleksində torpağa tapşırılıb. Sonradan bu məkan Teymurilər sülaləsinin ailə məqbərəsinə çevrilib. Əmir Teymurun məzarını üzərindəki tünd yaşıl nefrit qəbirdaşı isə abidənin ən diqqətçəkən elementlərindən biridir.
Media tur iştirakçıları məqbərənin həyətini və daxili salonlarını gəzərək abidənin memarlıq quruluşu, divar və günbəzlərdəki dekorativ işləmələr, kaşı sənəti və tarixi məzar daşları ilə tanış olublar.
Vurğulanıb ki, Səmərqənd Teymurilər dövründə mühüm siyasi, elm və mədəniyyət mərkəzinə çevrilib. Bu irsin mühüm nümunələrindən olan "Gur-e-Amir" məqbərəsi şəhərin tarixi simasının ayrılmaz hissəsidir.
Qeyd edək ki, Azərbaycan jurnalistlərinin Səmərqəndə səfəri zamanı tarixi abidələrlə tanışlıqla yanaşı, Özbəkistanın zəngin mədəni irsinin və turizm imkanlarının Azərbaycan ictimaiyyətinə təqdim olunması məqsədi daşıyır.
Jurnalistlər səfər çərçivəsində İslam dünyasının ən möhtəşəm memarlıq ansambllarından biri hesab olunan Registan meydanının tarixi və memarlıq xüsusiyyətləri ilə tanış olublar.
Jurnalistlərə meydanı əhatə edən Uluqbəy, Şirdar və Tilla-Kari mədrəsələri haqqında ətraflı məlumat verilib.
Bildirilib ki, Registan orta əsrlərdə Səmərqəndin elm, təhsil və mədəni həyatının əsas mərkəzlərindən biri olub. Meydanın memarlıq ansamblının formalaşmasında Uluqbəy mədrəsəsi xüsusi yer tutur. XV əsrdə inşa edilən mədrəsədə astronomiya, riyaziyyat, fəlsəfə və digər elmlər tədris olunub.
Media nümayəndələrinə Şirdar və Tilla-Kari mədrəsələrinin də Registanın memarlıq ansamblında mühüm yer tutduğu bildirilib. XVII əsrdə inşa edilən bu tikililər zəngin kaşı bəzəkləri, naxışları və monumental fasadları ilə seçilir.
Jurnalistlər mədrəsələrin fasadlarında istifadə olunan rəngarəng kaşı işləmələri, həndəsi və bitki ornamentləri, günbəzlər və digər memarlıq elementləri ilə tanış olublar.
Qeyd olunub ki, Registan Səmərqəndin tarixi simvollarından biri olmaqla yanaşı, Böyük İpək Yolu üzərində şəhərin elm, təhsil və mədəniyyət mərkəzinə çevrilməsində mühüm rol oynayıb. Meydan bu gün də Səmərqəndə gələn turistlərin ən çox ziyarət etdiyi məkanlardan biridir.
Azərbaycan jurnalistləri səfər zamanı Registan meydanının tarixi əhəmiyyəti, burada qorunan memarlıq irsi və tarixi abidələrin mühafizəsi istiqamətində görülən işlərlə yaxından tanış olublar.
Qeyd edək ki, Azərbaycan media nümayəndələrinin Səmərqəndə səfəri Özbəkistana təşkil olunan media tur çərçivəsində həyata keçirilir. Səfərin məqsədi ölkənin tarixi-mədəni irsinin, turizm imkanlarının və son illərdə həyata keçirilən layihələrin Azərbaycan ictimaiyyətinə təqdim edilməsidir.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
