Avropa Yayım Birliyinin (AYB) qərarına əsasən, 2023-cü ildə Böyük Britaniyada keçiriləcək “Avroviziya” mahnı müsabiqəsinə ev sahibliyi etmək üçün İngiltərənin altı şəhəri və Qlazqo namizədlərin qısa siyahısına düşüb.

Kulis.az xəbər verir ki, bu barədə AYB ilə birlikdə qalib şəhəri seçəcək “BBC” Yayım Korporasiyası məlumat verib.

"Birminqem, Qlazqo, Lids, Liverpul, Mançester, Nyukasl və Şeffildi təbrik edirik. Böyük Britaniyanın hər yerindən gələn müraciətlərin müxtəlifliyi heyrətamiz idi", - deyə korporasiyanın nümayəndəsi Keyt Fillips bildirib.

Müsabiqəyə ev sahibliyi etmək üçün Böyük Britaniyanın 20 şəhəri tərəfindən müraciətlər olunub, onlardan yeddisi bu miqyasda tədbirlərin təşkilində təcrübəyə malik şəhərlər kimi seçilib. “BBC” tərəfindən qiymətləndirilərək bir sıra göstəricilər üzrə ən yüksək bal toplayan şəhər qalib olacaq. Müsabiqənin keçiriləcəyi şəhərin adı payızda açıqlanacaq.

Qeyd edək ki, Turində keçirilən 66-cı “Avroviziya” mahnı müsabiqəsində Ukraynanın hip-hop qrupu Kaluş Orchestra “Stefaniya” mahnısı ilə qalib olub. İkinci yeri Böyük Britaniya, üçüncü yeri isə İspaniya tutub. Ənənəyə görə, “Avroviziya” müsabiqədə qalib gələn ölkədə keçirilir. Ukrayna 2023-cü ildə “Avroviziya”ya ev sahibliyi etməyə hazır olduğunu bəyan edib, lakin AYB iştirakçıların təhlükəsizliyinin təmin edilməsində çətinliklər səbəbindən müsabiqənin bu ölkədə keçirilə bilməyəcəyini bildirib. Bununla bağlı AYB Böyük Britaniyada müsabiqə təşkil etmək üçün “BBC” ilə danışıqlara başlayıb və razılıq əldə edib. Böyük Britaniya digər ölkələrdən fərqli olaraq səkkiz dəfə “Avroviziya” mahnı müsabiqəsinə ev sahibliyi edib. Sonuncu dəfə bu müsabiqə Böyük Britaniyada 1998-ci ildə keçirilib.

• Ömrü sürgündə keçən, Sibirdə quş yumurtası yeyib sağ qalan "xalq düşməni" - Ruhulla Axundov onun həyatını necə məhv etdi?
• Səlahəddin Əyyubi qalasında kəşf - Məscid və qədim su sistemi tapıldı
• Oljas Süleymenov: "Heydər Əliyev XX yüzilliyin ən güclü ideyalarının parlaq ifadəçisi idi" - TARİXİ ŞƏXSİYYƏT