Azərbaycan Kinematoqrafçılar İttifaqının əsas prioritet məsələlərindən biri də peşəkar tamaşaçı kütləsi formalaşdırmaqdır. Davamlı nümayiş və müzakirələrin ana məqsədi məhz budur. İttifaq hər il yerli, eyni zamanda, xarici filmləri də yerli tamaşaçılar üçün əlçatan edir.

Kulis.az xəbər verir ki, bu il Azərbaycan kinosunun 125, “Azərbaycanfilm” kinostudiyasının 100 və Azərbaycan Kinematoqrafçılar İttifaqının 60 illik yubileyi münasibətilə, AKİ klassik filmlərə də xüsusi yer ayırıb. Arif Babayevin “Gün keçdi”, Andrey Tarkovskinin “Güzgü”, Oktay Mir-Qasımın “Günaydın, mələyim”, Nikita Mixalkovun “Şahidsiz” və daha başqa filmlərin nümayişi təşkil edildi. Bu ənənəni davam etdirən AKİ payızda yeni filmlərin nümayişini təşkil edir.

Oktyabr ayında (10-11-12-17-24-31) “Visla” Polşa Film Festivalı ilə Polşa film günlərinə start veriləcək və proqram çərçivəsində 6 tammetrajlı yeni bədii film nümayiş olunacaq.

Noyabr ayında (7-14-21-28) İsveç səfirliyi ilə əməkdaşlıq çərçivəsində 4 tammetrajlı bədii film nümayiş olunacaq. Sənədli film həvəskarlarını da bu payız unutmadıq və dekabr ayında (5-12-19) “CineDoc” beynəlxalq sənədli film festivalı ilə əməkdaşlıq çərçivəsində 3 gürcü tammetrajlı sənədli filmləri nümayiş olunacaq. Bunlarla yanaşı “Azərbaycanfilm” studiyasının 100 illik yubileyi çərçivəsində “Yeddi oğul istərəm”, “İnsan məskən salır” filmlərinin nümayişi planlanır.

Qeyd edək ki nümayişlər “Azərbaycan” CinemaPlus-da baş tutacaq, giriş sərbəstdir.

• 100 il əvvəl yazılanlar... - Nəcəf bəy Vəzirovun əsərləri bu gün aktualdırmı?
• "Squid Game" ulduzunun yeni layihəsi: "Netfliks"dən daha bir Cənubi Koreya serialı
• "Evlilik müharibəyə getmək kimi bir macəradır..." - Tanınmış ingilis yazıçıdan aforizmlər