Kulis.az Allahşükür Ağanın Azərbaycan əsgərinə yazdığı məktubu təqdim edir.

Salam, əziz Dostum!

Hər uğurlu addımınla qürur duyuram. İgidliyin, qəhrəmanlığın bir şair dostun kimi məni çox sevindirir.

Əziz Dostum! Əsgərlik peşə deyil, müqəddəs amaldır. Məndən fərqin bu yağışlı, küləkli günlərdə qorxmadan gəzdiyin səngərdə böyük tarix yazmağındır. Belə də olmalıdır. Axı “Vətən - Əsgər əmanəti” deyilmişdir.

Vətən savaşının bu gün 25-ci günüdür. Cəbrayıl rayonu və kəndləri, Füzuli rayonu və kəndləri, Xocavəndin bir sıra kəndləri, Zəngilan şəhəri və kəndləri, Murov dağı silsiləsindəki Murov zirvəsi, bir sıra strateji yüksəkliklər mənfur düşməndən azad olunub. Bu böyük uğurun müəllifi sənsən - Əziz Dostum! Sənə təşəkkür edirəm. Dualarım səninlədir. Həzrəti Əlinin qılıncının gücü, Həzrəti Hüseynin iradəsi, Hz.Əbəlfəz Ağanın qeyrəti daim sənə kömək olsun.

O gün olsun üçrəngli bayrağımız Şuşada, Laçında, Kəlbəcərdə dalğalansın. Məncə, o gün uzaqda deyil, yaxındadır. Belə cəsarətli danışmağım sənə olan inamımın bariz nümunəsidir.

Əziz Dostum, sonda bir bəndlik şeir sovqatımı qəbul etməyi səndən rica edirəm.

Gur səsin qoy titrətsin,
Duysunlar haqqın səsin,
Hey zəfərə tələsin,
Azərbaycan Əsgəri
Eşq olsun Azərbaycan Əsgərinə!
Qarabağ Azərbaycandır!

• Fərariliyə görə həbs olunan, ölümünə həkimlərin bais olduğu Hacıbaba Bağırov kimdir?
• Rüstəm Behrudinin əsərləri türk və alman dillərində
• Məşhur musiqiçi intihar etdi