Məhbus Münzəvi

Kirpiklərində yellənən uşaq

"Mən kiməm?" Sualı qədər

müəmmalıdır

səni sevmə səbəbim

nə olur olsun yaşamaq

- budur həyatın tələbi

səni sevməyin də tələbləri var

necə olursansa ol sevməliyəm

uşaq yellənir kirpiklərinə qurduğu yelləncəkdə

mən uşağa "sevirəm" deyirəm

amma sənin cavabın

"əl çək də"

mən o uşağı qucağıma almaq istəyirəm

amma sən qucaqlardan düşmürsən

azad et içindəki uşağı

hoppana-hoppana qaçsın mənə tərəf

bir səhv və minlərlə kişi

hər kişi bir səhv

qoyma səhvlərin tək doğru olan o uşağı da aparsın

indi mənim bütün relslərim qatarsız

qapılarım qıfıllı, qıfıllar açarsız

"xanım, mənimlə də yatarsız?"

cümlələri bıçaqlayır məni də uşağı da

Pifaqor yandırır teoremini yazdığı vərəqləri

belə sevgi üçbucağı qarşısında

Sən başqa qollarda qızınırsan nə zaman üşüsən

Nyutonun cazibə qanununa əsasən gözümdən düşürsən

Sən getdiyin yolu Dao tanımır

Sənə baxanda Lolita da utanır

Mən utanıram Lolitadan...

Həvva Adəmə alma uzatmır

Eynşteyn gecələr yatmır

belə mütləqliyə hələ də anlam verə bilmir

Hər şey girdi sənə

bircə Erotun oxlarından başqa

Bir fahişəni sevmək çətin imiş

Dünən yaşlı murdar bir kişi daha sənə toxundu,

səni öpdü

Və yelləncəyin ipləri qopdu...

• "Qanun" nəşriyyatı nağıl müsabiqəsi elan edir
• Taksi sürücüləri evinə çörək aparmasın? - Danışır Ulucay
• Məşhur aktyor vəfat etdi