Denis Vilnövün məşhur fantastik franşizasının üçüncü filmi ilə bağlı yeni detallar açıqlanıb.
Kulis.az xəbər verir ki, ekran əsərinin quruluş rəssamı Patris Vermet çəkilişlər üçün 55 ton ağırlığında nəhəng kosmik gəmi hazırlandığını bildirib.
Vermetin sözlərinə görə, "Dune: Part Three" seriyanın ən böyük vizual layihəsi olacaq. O, filmin miqyasını atəşfəşanlığın final hissəsinə bənzədib: tamaşaçıya bütün əvvəlki hissələrdə görünən möhtəşəmliyin ardınca daha böyük bir sürpriz təqdim olunacaq.
Dekabrın 18-də nümayişə çıxması planlaşdırılan ekran əsərində Timoti Şalame yenidən Pol Atreydes obrazına qayıdır. Filmin süjeti Frenk Herbertin "Dune Messiah" romanından qaynaqlanır və ikinci filmdə baş verən hadisələrdən 17 il sonranı əhatə edir.
Bu dəfə tamaşaçılar artıq hakimiyyətə yüksəlmiş Polun imperator kimi üzləşdiyi nəticələri, siyasi mübarizəni və onun qərarlarının yaratdığı yeni böhranları izləyəcəklər.
55 tonluq gəminin tikilməsi rejissorun yalnız kompüter effektlərinə güvənmək istəmədiyini də göstərir. Real ölçülü dekorasiya və fiziki çəkiliş həlləri elmi-fantastik dünyanı daha inandırıcı etmək üçün seçilən vasitələrdəndir.
Beləliklə, "Dune" trilogiyasının finalı yalnız hekayənin deyil, vizual miqyasın da zirvəsi olmağa iddialıdır.
Ana səhifə
Reels
Yazarlar
Xəbərlər