"Warner Bros." və "DC" studiyaları dünya kinosunun ən çox gözlənilən layihələrindən biri olan "Betmen: İkinci hissə" filminin istehsalını dayandırıb.
Kulis.az xəbər verir ki, buna səbəb layihənin rejissoru Mett Rivzin şəxsi problemləri ilə əlaqədar çəkilişlərə fasilə vermək qərarıdır.
Studiyanın nümayəndəsi rəsmi bəyanatda məsələyə aydınlıq gətirib:
"'Betmen: İkinci hissə' filminin istehsalı Mett Rivzin diqqətini ailə məsələsinə yönəltməsi səbəbindən müvəqqəti olaraq dayandırılıb. Mett "DC" studiyalarının tam dəstəyinə malikdir və biz tezliklə bu səyahətə davam etməyi səbirsizliklə gözləyirik".
Robert Pattinsonun yenidən qaranlıq cəngavər obrazında qayıtdığı superqəhrəman filmi artıq bir neçə dəfə təxirə salınıb. Layihənin əvvəlcə 2026-cı il oktyabrın 2-də ekranlara çıxması planlaşdırılsa da, studiya bu tarixi 2027-ci il oktyabrın 1-nə keçirmişdi. İyul ayında isə premyera 2028-ci ilin fevralına qədər uzadıldı.
Qeyd edək ki, birinci "Betmen" filmi 2022-ci ilin martında nümayiş olunmuşdu. Yeni filmdə Pattinsonla yanaşı Skarlett Yohansson, Kolin Farrell, Sebastyan Sten, Endi Serkis və Ceffri Rayt kimi ulduzlar da rol alacaqlar.
Ceyms Qanndan etirazlara cavab
İlk təxirəsalma qərarından sonra "DC" studiyasının rəhbəri Ceyms Qann "Threads" platformasında bu addımı müdafiə edərək böyük blokbasterlərin davam filmləri arasında illərlə fasilə olmasının normal hal olduğunu yazmışdı:
"Ədalətli olmaq üçün deyim ki, sikvellər arasında 5 və ya daha çox illik fasilə olduqca populyardır. "Yadplanetli" filmləri arasında 7 il, "İnanılmazlar" arasında 14 il, ilk iki "Terminator" arasında 7 il, "Avatar" filmlərində 13 il, "Top Qan"larda 36 il və əlbəttə ki, mənim "Qalaktika mühafizəçiləri" filmlərimin ikinci və üçüncü hissələri arasında 6 il fərq var idi".
Robert Pattinson: "Bu, çox iddialı layihədir"
"Collider" nəşrinə verdiyi son müsahibəsində Robert Pattinson yeni filmin birincidən tamamilə fərqli bir yanaşma olacağını bildirib:
"Bu, çox iddialı layihədir. Ötən gün dediyim kimi, birinci film Betmenə fərqli bir yanaşma idi, bu isə tamamilə başqadır. Birinci hissədən kəskin şəkildə fərqlənir, lakin hansısa yolla onun əsas atmosferini qoruyub saxlayır. Layihə həqiqətən çox iddialı hiss olunur və mən bunun necə alınacağını görmək üçün səbirsizlənirəm".
Mett Rivzin qaranlıq Qotemi və yeni kino kainatı
2022-ci ildə ekranlara çıxan birinci "Betmen" filmi superqəhrəman janrından daha çox detektiv və neo-nuar elementləri ilə zəngin idi. Rejissor Mett Rivz Qotem şəhərini indiyədək görünməmiş qədər realist, korrupsiyalaşmış və qaranlıq təsvir etmişdi. Ceyms Qann "DC" kino kainatının rəhbərliyinə gəldikdən sonra bir çox köhnə layihələri (o cümlədən Supermen və Akvamen xətlərini) sıfırlasa da, Mett Rivzin yaratdığı "Betmen" dünyasına toxunmadı və onu xüsusi bir xətt olaraq qoruyub saxladı. Filmin davamının bu qədər ləngiməsi studiyanın ssenariyə və xarakterlərin inkişafına (xüsusən də Kolin Farrellin canlandırdığı Pinqvin obrazının fərdi serialından sonrakı hadisələrə) xüsusi həssaslıqla yanaşdığını göstərir.
Ülvi Bahadır
Ana səhifə
Reels
Yazarlar
Xəbərlər