8 Noyabr - Zəfər Günü münasibətilə Vyanada Azərbaycan Mədəniyyət Mərkəzində “270-ci səhifə“ sənədli filminin təqdimatı olub.

Kulis.az xəbər verir ki, Azərbaycanın Avstriyadakı səfirliyinin Mədəniyyət Mərkəzi ilə birgə təşkil etdiyi tədbirdə Vyanada akkreditə olunmuş diplomatik korpusun və beynəlxalq təşkilatların təmsilçiləri, yerli ictimaiyyətin nümayəndələri və soydaşlarımız iştirak ediblər.

Tədbirin açılışında Azərbaycanın Avstriyadakı səfiri Rövşən Sadıqbəyli, Mədəniyyət Mərkəzinin rəhbəri Leyla Qasımova və sənədli filmin layihə rəhbəri və ssenari müəllifi Ayaz Mirzəyev çıxış ediblər. Çıxışlarda tam dörd il bundan əvvəl Azərbaycanın öz suverenliyini və ərazi bütövlüyünü bərpa etdiyi və münaqişəyə son qoyduğu bildirilib, Vətən torpaqlarının işğaldan azad edilməsi uğrunda canından keçən igid Azərbaycan övladlarının xatirəsi anılıb. Qeyd edilib ki, Azərbaycan Cənubi Qafqaz regionunda sülh və əməkdaşlıq naminə ciddi addımlar atır, Qarabağ bölgəsində yenidənqurma və bərpa işləri sürətlə davam edir. Sülh, əmin-amanlıq, regional əməkdaşlıq və inkişafı diqqət mərkəzində saxlayan Azərbaycan, eyni zamanda, qlobal mövzulara da öz töhfəsini verir və yaxın günlərdə Bakının ev sahibliyi edəcəyi COP29 buna bariz nümunədir.

Bildirilib ki, bu sənədli film Azərbaycanın dilbər guşəsi Şuşa şəhərinə həsr olunub və 2022-ci ildə 270 yaşı qeyd edildiyinə görə filmin adı rəmzi olaraq “270-ci səhifə” olaraq seçilib. Diqqətə çatdırılıb ki, Qarabağ xanlığının mərkəzi kimi inşa edilən Şuşa şəhəri “Azərbaycan musiqisinin beşiyi” və Qafqazın konservatoriyası kimi məşhurdur. Burada görkəmli Azərbaycan musiqiçi, şair, yazıçı, ictimai-siyasi xadimləri yaşayıb-yaradıblar.

Filmdə Şuşa şəhərinin tarixi ilk dövrlərdən günümüzədək işıqlandırılır, onun maddi-mədəni irsi, tarixi abidələri, görkəmli tarixi şəxsiyyətləri, bu şəhərin mədəni mühiti barədə bəhs olunur, Şuşa sakinləri işğaldan əvvəlki dövrə aid xatirələrini bölüşürlər.

Ekran əsərində Müzəffər Ali Baş Komandan İlham Əliyevin rəhbərliyi altında Azərbaycan Ordusunun Şuşanı işğaldan azad etməsi və şəhərin artıq dirçəlməkdə olmasına yer ayrılıb.

Filmin ardınca artıq bu gün həyatın qaynadığı, sakinlərin geri döndüyü, abadlaşan və dağıntılar altından dirçələn Şuşa şəhərinin görüntüləri də təqdim olunub.

Film təqdimatından sonra ziyafət verilib.

• Şahzadə Diananın əşyaları ABŞ-də nümayiş olunacaq
• Nəcəf Nəcəfovun məzarı üzərindəki barelyefi oğurlayan tutuldu
• Zvyaqintsevin adı Rusiyanın "qara siyahı"sında - Səbəb