Bu gün Əməkdar artist Xumar Qədimovanın yeni mahnısının təqdimatı olub.

Kulis.az xəbər verir ki, müğənni bu dəfə “Şuşa” adlı yeni əsər ifa edib. Mahnının sözləri yazıçı, jurnalist, “525-ci qəzet”in baş redaktoru Rəşad Məcidə, musiqisi Xumar Qədimovanın özünə məxsusdur.

Tədbirdə Azərbaycan Yazıçılar Birliyinin sədr müavini Rəşad Məcid, millət vəkili Aqil Abbas, Əməkdar jurnalist İradə Tuncay, akademik Könül Bünyadzadə, jurnalist Zemfira Məhərrəmli, bəstəkar-şair Xanım İsmayılqızı, Mətbuat Şurasının sədri Əflatun Amaşov və bir çox tanınmış simalar, eləcə də media mənsubları iştirak ediblər.

Tədbiri açılış nitqi ilə şeirin müəllifi Rəşad Məcid çıxış edib. O bildirib ki, 1979-cu ildə 15 yaşında olarkən Şuşaya həsr etdiyi “Cıdır düzü” şeirini yazıb. 12-13 may 2021-ci il tarixlərində Şuada keçirilən “Xarıbülbül” musiqi festivalında olarkən isə şair, 42 ildən sonra Şuşa haqqında yeni şeir yazıb. Müəllif şeiri səsləndirib.

Daha sonra mahnının təqdimatı keçirilib. Tədbirdə Xumar Qədimova da çıxış edib. O bildirib ki, ilk dəfə sənətə Şuşaya həsr etdiyi “İsa bulağı” mahnısı ilə gəlib:

“Ona görə də möhtəşəm zəfərdən sonra Şuşaya mahnı həsr etməyə bilməzdim. Əziz dostum Rəşad Məcid mənə bu şeiri oxuyanda çox xoşuma gəldi. İçdən, səmimi hisslərlə yazılmışdı. Qərara gəldim ki, şeirə musiqi bəstələyib ifa edim. Fikrimcə, bu bəstə Şuşaya həsr olunmuş mahnıların tacıdır. Mahnıda sevgi, həsrət, çoşqu, çağırış və qələbə var”.

• Əhməd bəy Ağaoğluna həsr edilən kitabın təqdimatı oldu
• "Körpücük sümüyündə öpüşümü buraxdım?.." - Sevinc Yunuslunun yeni şeirləri
• Şərq estetik düşüncəsi Qərb avanqard ənənəsi ilə vəhdətdə - Aydan Salahovanın qadın obrazları nəyi simvolizə edir?