Biləcəri məktəbinin 32 yaşlı ingilis dili müəlliməsi, eyni məktəbin məzunu olan gəncə qoşularaq qaçıb.

Səhərdən mediamızın da, sosial mediamızın da müzakirə mövzusu budur.

Doğrudan da, çox iyrənc bir dövrdə yaşayırıq.

Təməli yeni qoyulan ailənin sirləri ortalara tökülür, anasının razılığı, direktorun narazılığı... Və hətta bu fars gedib Təhsil Nazirliyinə çıxır.

Nazirlik münasibət bildirməliymiş!

Oğlan məktəbi qurtarıb müəlliməsi ilə evlənib, buna nazirlik neyləsin?

Və bu hadisənin ictimai əhəmiyyəti nədədir?

Ortada bir cinayət, azyaşlı ilə nikah varmı? Yoxdur!

Xanım, ya da bəy, ictimai fiqurlardırmı ki, onların həyatı ictimaiyyət üçün maraqlı olsun? Xeyr!

Hansısa bir zorakılıq olubmu? Olmayıb. Sadəcə ailələrin razılığı olmayan bütün cütlüklər kimi qoşulub qaçıblar.

Adicə bir hadisə media tərəfindən şişirdilərək gündəmə gətirilir, halbuki KİV haqqında qanun bu cür xəbərlərin verilməsini birmənalı şəkildə qadağan edir (Maddə 60. IV bənd).

Amma elə bu media erkən nikah məsələsinə qarşı tamamilə diqqətsizdir, nə bu barədə doğru-dürüst bir araşdırma var, nə maarifləndirmə var, nə də ictimai müzakirə.

Bu jurnalistika deyil...

Bu küçə qeybətidir.

Və bu medianın mövcudluğu erkən nikahlardan da təhlükəlidir!

• "Prison Break" serialı yenidən çəkiləcək
• Rejissorumuzun film layihəsi CEDOC Marketdə iştirak edib
• "Sən kimsən ki..." - Səidə Quliyevanın ölüm xəbərini kim yayıb?