Qadın olmaq bütün dünyada çətindir. Kişi zorakılığı ilə bağlı daha bir xəbər Pakistandan gəldi. Ölkənin ən məşhur modeli, müğənnisi, aktrisası Qandil Baloç qardaşı tərəfindən namus üstündə öldürüldü.

Əsl adı Fouzia Azeem olan 1990 təvəllüdlü gənc qadını şöhrətin zirvəsinə çıxaran hadisə idman yarışlarının birində Pakistan qalib gələcəyi təqdirdə striptiz-şou göstərəcəyini bildirməsi oldu.

Universitet bitirən, 7 dil bilən və sosial şəbəkələrdə minlərlə təqibçisi olan sənətçiyə Pakistanın Kim Kardaşyanı deyirdilər.

O, ötən həftə öz evində ölmüş vəziyyətdə tapıldı. Polisin açıqlamasına görə, model qardaşı Vasem Azen tərəfindən yatdığı yerdə boğularaq öldürülmüşdü. Zəhərlənmə ehtimalı da var.

Keçən Ramazan ayında məşhur din adamlarının biriylə otel otağında çəkdirdiyi selfi də ictimaiyyətin böyük marağına səbəb olmuşdu.

Özəlliklə din adamlarının baş geyimini geyinməsi rezonans yaratmışdı. Halbuki əvvəllər qərblilərə məxsus açıq-saçıq fotolarla etiraz yaratmışdı.

Onun ölümünə səbəb kimi bu hadisələr də düşünülür.

Qardaşı həbs edildikdən sonra mətbuat qarşısında öz günahını etiraf edərək, bacısının hərəkətlərinə görə xəcalət çəkdiyini deyib və törətdiyi əməldən peşman olmadığını bildirib.

Qandil Baloçun bu cür tragik ölümü ölkədə şok effekti yaradıb.

O, qadın haqlarının radikal müdafiəçisi sayılırdı.

Ölümündən öncə ən son bu sözləri söyləmişdi: “Bir qadın olaraq biz özümüz üçün ayağa qalxmalıyıq. Mən modern zamanların feministi olduğuma inanıram. Necə bir qadın olacağımı əvvəlcədən seçmək məcburiyyətində deyiləm. Bircə, özümüzü cəmiyyətin təsiri altına salmamağı düşünürəm. Mən sadəcə azad fikirli bir qadınam və özümü bu şəkildə sevirəm.”

• Şarliz Teron yeni filminin çəkilişlərində xəsarət aldı
• Ankara Hacı Bayram Vəli Universitetində azərbaycanlı müəlliflərlə görüş keçiriləcək
• "Tərk etməyi öyrən, xoşbəxtliyin açarı budur..." - Buddadan hikmətli kəlamlar