Kulis.az Nicat Şükürlünün "Sosial şəbəkələrdə yatıb - duranlar" yazısını təqdim edir.

Dəfələrlə saytların xəbər başlıqlarına görə qınandığını görmüşəm. Mən də əvvəllər qınayanlar cərgəsindəydim. Sonra anladım ki, siz oxucular da az aşın duzu deyilsiniz.

İlahi, bir xəbər barəsində bildiniz - bilmədiniz nə qədər status yazmaq, müzakirə etmək olar? Sizin üzünüzdən rezonans doğuracaq səviyyədə hadisə olanda sosial şəbəkələrə - ən çox da facebooka bir müddətlik girmirəm.

Özünüzü ekspert zənn edən böyüklü-kiçikli sizlərin əlindən telefon düşmür. Sanarsan ki, telefonla doğulmusunuz, telefon sizlərə hava, su kimi lazımdır.

Post paylaşmasanız, şərh yazmasanız, bağrınız yarılar, ürəyiniz partlayar.

Sizlərə deyilsə ki, hansısa xeyirli, faydalı bir işlə məşğul olaq, cavabınız hazırdır: "Vaxtım yoxdur"

Anam, atam, bacım, qardaşım, necə olur günün istənilən vaxtında status paylaşa, şərh yaza bilirsən, amma yığışıb bir kitabı müzakirə etməyə, iməcilik keçirməyə, uşaqlar evini ya da qocalar evini ziyarət etməyə və s. xeyirxah, faydalı işlər görməyə vaxt tapa bilmirsən? İnciməyin, kobud desəm, mənasız, məzmunsuz həyat yaşayan siz və sizin kimilərin bu cavabına bələkdəki uşaq belə gülər.

Mən əminəm ki, ölkədə rezonans doğuracaq qədər bir hadisə baş verməyəndə sizlər bərk darıxırsınız. Bəlkə də, özünüzü önəmli hiss edəcəyiniz pis hadisələr baş verməsini arzulayırsınız! Səbirsizliklə gözləyirsiniz.

Paylaşdığınız hadisəyə mütləq xoş rəy gəlməlidir. Yoxsa sizinlə həmfikir olmayanlara dişlərinizi qıcayırsınız. Uşaq kimi dostluqdan çıxarırsınız ya da bloka atırsınız.

Çünki mənəvi boşluqda olan sizlər təsdiqlənmə ehtiyacı duyursunuz. Hamıda sizlərlə eyni fikirdə olmaq məcburiyyətindədir. Böyük dərddir vallah.

Allah heç düşmənimi də sizlərin halına salmasın.

• Suyun altında qədim amforalar tapıldı
• Renuarın muzeyi qarət olundu
• Miray Kerinin məhkəməsi bitdi