Fevralın 25-də Azərbaycan Mətbuat Şurasında tanınmış jurnalist, Əməkdar mədəniyyət işçisi Şakir Yaqubovun 75 illiyi qeyd olunub.

Kulis.az xəbər verir ki, anım tədbirində mərhum jurnalistin qələm dostları, iş yoldaşları, yetirmələri və ailə üzvləri iştirak ediblər.

Tədbirdə çıxış edən Mətbuat Şurasının sədri Rəşad Məcid tanınmış qələm sahibinin söz sənətinə bütün varlığı ilə bağlı olduğunu, jurnalistikanı həyat amalına çevirdiyini qeyd edib.

Onun sözlərinə görə, Şakir Yaqubov peşəsini yalnız icra etmirdi, onu yaşayır və yaşadırdı: “O, müxtəlif janrlarda yazdığı kitablar və çoxsaylı qəzet məqalələri ilə mətbuat tarixində özünəməxsus iz qoyub. Şakir Yaqubov istedadlı müəllif olmaqla yanaşı, redaktorluq sənətinin də incəliklərini dərindən bilən peşəkar idi. Onun redaktəsindən keçən yazılar sanki yenidən formalaşır, zəif görünən mətnlər belə daha dolğun məzmun və ifadə gücü qazanaraq oxucuya təqdim olunurdu. O, sözə həssas yanaşması və peşəkar ustalığı ilə hər zaman nümunə göstərilən sənətkar kimi xatırlanacaq”.

Əməkdar jurnalistlər Tahir Aydınoğlu, Elşən Əliyev, Əntiqə Qonaq, Əməkdar mədəniyyət işçiləri Müsəllim Həsənov, Qüdrət Piriyev və digər natiqlər Şakir Yaqubovun zəngin yaradıcılığından və ustadlıq missiyasından söz açıb, bu gün Azərbaycan mətbuatında çalışan bir sıra istedadlı jurnalistlərin yetişməsindəki xidmətlərini xatırlayaraq, xoş xatirələrini bölüşüblər.

Çıxışçılar diqqətə çatdırıb ki, Şakir Yaqubov Azərbaycan Mətbuat Şurasının Ali Media Mükafatına, “Qızıl qələm” və “Həsən bəy Zərdabi” mükafatlarına, 10-dək yaradıcılıq müsabiqəsinin mükafatlarına layiq görülüb. O, iki dəfə Əməkdar mədəniyyət işçisi və “Azərbaycan Respublikasının fəxri auditoru” adını alan yeganə jurnalistdir.

Tədbirin sonunda Şakir Yaqubovun “Taleyimdən keçənlər”, “Yaddaşımın küncündən…”, “Bir az da futbol(umuz)dan”, “Banişevski olduğu kimi” kitabları iştirakçılara təqdim olunub.

• Zorlamada ittiham olunan məşhur aktyordan açıqlama
• Məşhur aktyor vəfat etdi
• Göyə çıxdı - Cəfər Cabbarlı