Prezident Kitabxanasında şair-publisist, Azərbaycan Yazıçılar Birliyinin üzvü, ali dərəcəli həkim-psixiatr Tamilla Axundovanın yaradıcılığına həsr olunan ədəbi-bədii görüş keçirilib.

Kulis.az xəbər verir ki, tədbirdə çıxış edən Prezident Kitabxanasının direktoru, professor Afət Abbasova Tamilla Axundovanın həm tibb sahəsindəki fəaliyyətinin, həm də bədii yaradıcılığının insan ruhuna toxunan məqamlarından bəhs edib.

Xalq yazıçıları Anar, Elmira Axundova, Xalq rəssamı Fərhad Xəlilov, Xalq artistləri Şəfiqə Məmmədova, Şükufə Yusupova və Faiq Sücəddinov, professorlar Flora Naci, Sevda Məmmədəliyeva, eləcə də Vaqif Mustafazadənin ev-muzeyinin direktoru Afaq Əliyeva, yazıçı-publisist Təranə Məmməd və digər ziyalılar, həmçinin rəssamlar Nigar Süleyman və Bəhram Xəlilov, hüquqşünas Fərid Haqverdiyev, həmçinin müxtəlif elm sahələrini təmsil edən Gülarə İmanova, Aybəniz Hacıyeva, Nərgiz Qulubəyova və Nigar Cuvarlinskaya və digər ziyalılar Tamilla Axundovanın yaradıcılığı haqqında fikirlərini bölüşüblər.

Çıxışçılar qeyd edib ki, müəllifin yaradıcılığında məhəbbət-lirika mövzusu çoxşaxəli şəkildə və zəngin bədii təsvirlərlə öz təcəssümünü tapıb. Eyni zamanda, bu poetik nümunələrin həm psixoloji dərinliyi, həm də bədii-estetik dəyəri dinləyicilərin diqqətinə çatdırılıb.

Bəstəkar-ifaçı Sevinc İbrahimova, sənətşünas Alyona İnyakina və Azərbaycan Dövlət Akademik Musiqili Teatrının solisti Yuliya Heydərovanın ifalarında Tamilla Axundovanın sözlərinə bəstələnən mahnılar səsləndirilib.

Tədbir zamanı Tamilla Axundova öz şeirlərini oxuyub. Görüş musiqili-bədii kompozisiyalarla davam edib.

• "Allaha əl açırdım dua üçün - növbəydi" - Həyat Şəminin yeni şeirləri
• Azərbaycanlı yazıçının hekayəsi ABŞ-ın nüfuzlu jurnalının müsabiqəsində uzun siyahıya düşdü
• "Oskar"lı ulduzdan böyük layihə