Bakıda Xəzər universiteti və Litva səfirliyinin birgə təşkilatçılığı ilə Litvada yaşayan ukraynalı qaçqınların fotolarından ibarət “Onların hamısı deyil. Müharibə qaçqınlarının portretləri” adlı sərgi təşkil edilib.

APA xəbər verir ki, tədbirdə universitet tələbələri, Ukraynanın ölkəmizdəki səfiri Yuri Husyev, digər diplomatlar və media nümayəndələri iştirak edib.

Açılış üçün Xəzər universitetinin təsisçisi Hamlet İsaxanlı və universitetin rektoru Raziyə İsayeva çıxış edib. Natiqlər ölkələrimiz arasında əlaqələrə diqqət çəkərək, universitetin Litva təhsil müəssisələri ilə elmi əməkdaşlığa hazır olduğunu vurğulayıblar.

Tədbirdə Litva Baş naziri İnqa Ruqiniene çıxış edib. O, litvalıların öz evlərini könüllü surətdə ukraynalı qaçqınlara açdığını bildirib və Ukrayna xalqının əzmkar xarakteri barədə danışıb.

“Fotolardakı insanların gözlərinə baxdıqda Ukrayna xalqının məğlubedilməz olduğunu görmək olur”,- Baş nazir qeyd edib.

Ardınca Ukrayna səfiri Yuri Husyev çıxış edib. O, Ukraynaya göstərilən dəstəyə görə Azərbaycan və Litvaya təşəkkür edib. Səfir bu ölkələri ukraynalılar üçün ikinci ev adlandırıb.

Tədbir bədii hissə ilə davam edib.

Sonra isə Hamlet İsaxanlı tərəfindən Litva Baş nazirinə hədiyyə təqdim olunub və xatirə şəkil çəkilib.

Sonda qonaqlar sərgidə nümayiş etdirilən fotolarla tanış olub.

• "Kütlə həqiqəti sevmir..." - "İntellektualların xəyanəti" kitabından sitatlar
• Zərdabinin qızının övladlığa götürdüyü bəstəkar kimdir?
• Azərbaycan rəssamlığında sərt realizmin yaradıcısı - Onun tablolarında qara və qırmızı rəng nəyi ifadə edir?