Kulis.az Arzu Əsədin yeni yazısını təqdim edir.

Yazıçılar Azərbaycan dilindən imtahan versinlər. Bundan daha absurd bir fikir səsləndirmək olarmı? Yazıçı bu imtahanı kimə verəcək? Bu imtahanın müqabilində yazıçıya hansı imtiyazlar, hansı vəzifələr vəd olunur?

Yazıçı hər saat, hər gün, hər cümləsini yazanda butün xalqın, bugünkü və gələcək nəsillərin qarşısında dil imtahanı vermirmi? Bütün dərsliklərdə "yazıçı" sözü dilin öyrənilməsi üçün bir nümunə olub.

Azərbaycan yazıçısını - Azərbaycan dilinin yaradıcısı, qoruyucusu və inkişaf etdiricisini bu qədər aşağılamaqla nəyə nail olunmaq istənilir? Bu nədir? Meyarların tamamilə gömülməsimi? Etalonların heçə sayılmasımı?

Bu axır çərşənbədə qulaqlarımız bu xəbəri də eşitməli idimi? Kim kimdən Azərbaycan dili imtahanı götürəcək? Gəlib bu məqama da çatdıq?

Postmodernizmin - dəyərlər sisteminin baş-ayaq olmasının belə absurd təzahürü hələ yəqin ki, heç bir ölkədə görünməyib.

Bir aqil bir zaman öz şagirdinə meyarların itdiyi, yağla şorun qiyməti eyni olan məmləkəti təcili şəkildə tərk etməyi tövsiyə etmişdi axı. Ona qulaq asmayan şagirdi bir gün şəhər mərkəzində boynu qısıq bir qəssabın yerinə, sadəcə, boynu ipə daha yaxşı gəldiyinə görə asılmışdı axı.

Mən niyə hələ bu məmləkətdəyəm? Mən nəyi gözləyirəm? Boynumun ipə nə vaxt gələcəyini?

• Məşhur türk aktyor Milli Dram Teatrının dəvəti ilə Bakıya gəlir
• “Xalq şairi Hökümə Billuri -100” adlı kitab sərgisi açıldı
• Kevin Speysiyə qarşı növbəti ittiham: "Gücdən sui-istifadə"