Fransız komediya ustası və məşhur bloqer Qreqori Giyotin keçmiş sevgilisinin şikayəti əsasında polis tərəfindən nəzarətə götürülüb.

Kulis.az xəbər verir ki, bu barədə "franceinfo.fr" məlumat yayıb.

27 yaşlı keçmiş partnyoru Giyotini 2019-cu ildən 2026-cı ilə qədər davam edən, mütəmadi xarakter daşıyan fiziki və psixoloji zorakılıqda ittiham edib. Zərərçəkən qadının sözlərinə görə, bloqer onu dəfələrlə döyüb, alçaldıb, ona qarşı psixoloji təzyiq göstərib, təhqir edib və gizli şəkildə izləyib. Ulduzun keçmiş sevgilisi yaşananlardan sonra məhkəməyə müraciət edərək ondan şikayətçi olub. 28 sentyabr 2026-cı il tarixində isə komediyaçı barəsində polis nəzarəti qərarı tətbiq edilib.

Hadisə ictimailəşdikdən sonra 4.5 milyona yaxın abunəçisi olan "YouTube" ulduzu sosial şəbəkələrdə öz günahını etiraf edib. O bu davranışına görə böyük utanc hissi keçirdiyini və hazırda psixoloji terapiya aldığını vurğulayıb. Komediyaçı eyni zamanda istintaqdan yayınmayacağını və lazım olan bütün materialları təqdim edəcəyinə söz verib.

Giyotin bəyanatında izləyicilərinə belə səslənib: "İllər ərzində mən milyonlarla insanı güldürürdüm, lakin eyni vaxtda öz evimdə, həyatımı bölüşdüyüm insana qarşı dəfələrlə zorakılıq etmişəm. Bunların hər ikisi həqiqətdir. Hər iki halda bunu mən etmişəm. Lakin mən artıq ikincini (zorakılığı) edən o adam olmaq istəmirəm. Mən heç nəyi inkar etməyəcək və ya özümə haqq qazandırmayacağam. Çox utanıram".

Qeyd edək ki, qadının vəkili mətbuata açıqlamasında şikayətçinin başqa potensial qurbanların da danışmasına cəsarət vermək üçün məhz bu addımı atdığını bildirib.

Qreqori Giyotin kimdir?

Qreqori Giyotin (Grégory Guillotin) — Fransanın ən populyar və tanınmış internet komediyaçılarından biri, ssenarist və aktyordur. O, əsasən "Gizli kamera" (Caméra cachée) formatında çəkdiyi videolara və xüsusilə "Ən pis təcrübəçi" (Le Pire Stagiaire) adlı məşhur prank seriyasına görə qlobal izləyici kütləsi toplayıb. Onun videoları "YouTube" platformasında yüz milyonlarla baxış sayı toplayır. İctimaiyyət qarşısında həmişə müsbət, yumoristik və şən bir obraz yaradan Giyotinin şəxsi həyatında qəddar, manipulyativ və zorakı biri olduğunun üzə çıxması, Fransa mediasında və sosial şəbəkələrdə böyük rezonans doğurub.

• Xalq artisti Şəfiqə Məmmədova: "İttifaq daxilində bir çox çətinliklər var"
• "Sevərik bir-birimizi dodaqlarımızla..." - Fransız şairdən sevgi şeirləri
• Ədəbiyyatın görünən üzü aldadıcıdır – Bir hekayənin arxasındakı ikinci dünya