Sentyabrın 27-də “Park Cinema” kinoteatrlar şəbəkəsində “Mən burdayam, ilahi!” tammetrajlı bədii filminin premyerası baş tutub.

Kulis.az xəbər verir ki, İkinci Qarabağ müharibəsinin üçüncü ildönümündə tamaşaçıların ixtiyarına verilən filmin rejissoru Qulu Əsgərov, ssenari müəllifi Nicat Dadaşovdur.

Rejissor Q.Əsgərovun sözlərinə görə, real hadisələr əsasında çəkilmiş filmin əsas mövzusu müharibənin insan həyatına vurduğu mənəvi-psixoloji zərbələrdir. Süjetdə ağır döyüş səhnələrindən daha çox, müharibənin insan psixologiyasında buraxdığı izlər və müharibədən çıxmış insanların həyata müqaviməti ön plana çəkilir.

Üç aydan sonra komadan ayılan Vətən müharibəsi iştirakçısı, anasının rəhmətə getdiyini və qızının internata himayəyə verildiyini öyrənir. İndi o, övladına sahib çıxa bilmək üçün həyatını qaydasına salmağa çalışır.

“CİNEART GROUP” kino şirkəti tərəfindən istehsal olunan filmin aktyor heyətində Rasim Cəfər, Aygün Əlipənahova, Günay Həsən, Ayşad Məmmədov və Leyli Vəliyeva kimi tanınmış simalar yer alıb. Filmə texniki dəstək “Ultra Production” kino şirkəti tərəfindən göstərilib. Filmin prodüseri Həsən Axundov, operatoru Vasif Vəlizadə, bəstəkarı Azər Hacıəsgərlidir.

“Mən burdayam, ilahi!” bədii filminin baş sponsoru “İctimai TV”dir. Filmə maliyyə dəstəyi göstərənlərdən biri də “Animed” əczaçılıq şirkətidir.

Xatırladaq ki, “Mən burdayam, ilahi!” bədii filmi 2023-cü ildə Azərbaycan Kinematoqrafçılar İttifaqının “Ən yaxşı prodüser işi” (Nicat Dadaşov və Həsən Axundov) kateqoriyasında ənənəvi illik mükafatına layiq görülüb. Azərbaycan Kinematoqrafçılar İttifaqı sözügedən filmə informasiya dəstəyi və maliyyə dəstəyi də göstərib.

• Marina Svetayevanın "Cənnətin limanında" şeir toplusu nəşr olundu
• Şekspir əsərində bəhs edirdi, Da Vinçi fanatı idi, Makiavelli oynayırdı - Kralların nifrət etdiyi futbol necə dünyanın ən çox sevilən oyununa çevrildi?
• "Oğrular pul kisəsini və ya canını tələb edir, qadınlar isə hər ikisini..." - İngilis yazıçıdan sitatlar