Azərbaycan yazıçısı Kamran Nəzirlinin “Sevgi ağ rəngdə olur” adlı hekayələr toplusu Təbrizin “Aydınsav” nəşriyyatında çapdan buraxılıb.

Kulis.az xəbər verir ki, kitabda yazıçının son illər yazdığı “Yarpaqlar töküləndə”, “Sevgi ağ rəngdə olur”, “Mənim sevimli yaddaşım”, “Qara nöqtə”, “Şopenin sonatası”, “Yelləncək, süpürgəçi qadın və pişik”, habelə digər hekayələri yer alıb.

Kütləvi tirajla çap olunan kitab artıq satışdadır.

Kitabın ərsəyə gəlməsində “Aydınsav” Təbriz Nəşriyyatının müdiri və tərtibçisi Aydın Dumanın, mətnləri fars dili əlifbasına uyğunlaşdıran təbrizli şair və tərcüməçi Nurəddin Müsəddiqinin müstəsna xidməti olub.

“Təbrizli qələm dostlarımdan mənim üçün sürpriz oldu. Düzü, iki ildən çox idi ki, onlar mənə bildirmişdilər ki, kitabı çap eləmək niyyətləri var. Mən də razılıq vermişdim. Bu müddət ərzində daha əlaqəmiz kəsilmişdi. İranda baş verən məlum hadisələr və digər problemlər kitabın işıq üzü görməsini gecikdirmişdi. Görünür, indi soydaşlarımızın ana dilində kitab nəşr eləmək və oxumaq imkanları artmışdır və bu da təqdirəlayiqdir. İranda ilk dəfədir kitabım çıxıb, sevinirəm ki, Cənubi Azərbaycan oxucuları ana dilimizdə mənim kitabımı da oxuya biləcəklər. Kitabın meydana gəlməsində əməyi olan hər kəsə, o cümlədən mənim qələm dostum qazi şairimiz Nazim əfəndiyə təşəkkürümü bildirirəm”, - deyə müəllif söyləyib.

• Odun dili, suyun yaddaşı, torpağın nəfəsi... - İlaxır çərşənbə adətləri
• Gözəllər yanımda xəzələ döndü - Hüseyn Cavid
• Soyqırım günü doğulan, terrorda həlak olan dahi