Respublika Gənclər Kitabxanasında Xalq şairi Nəriman Həsənzadənin 95 illik yubileyi münasibətilə silsilə materiallar – “İnsani duyğular tərənnümü-Nəriman Həsənzadə” adlı metodik vəsait və virtual kitab sərgisi hazırlanıb.

Kulis.az xəbər verir ki, metodik vəsaitdə Xalq şairi Nəriman Həsənzadənin "Şöhrət" , “Şərəf” və “İstiqlal” ordenləri ilə təltif edilməsi ilə bağlı qəbul edilən rəsmi sənədlərin, Heydər Əliyev Mükafatının verilməsi haqqında Azərbaycan Respublikası Prezidentinin Sərəncamının və 17 fevral 2021-ci il tarixində şairə ünvanladığı müraciətin tam mətni təqdim edilib.

Kitabxananın rəsmi saytında https://www.ryl.az/funds/metodik-vesaitler yerləşdirilən vəsaitdə Nəriman Həsənzadənin həyat və yaradıcılığı haqqında məlumat, görkəmli şəxslərin onun haqqında fikirləri, şairin özünün görkəmli şəxsiyyətlər haqqında söylədiyi dəyərli sözlər, akademik Nizami Cəfərovun “Nəriman Həsənzadənin poetik məni” adlı məqaləsinin tam mətni yer alıb.

Metodiki vəsaitdə Xalq şairinin zəngin ədəbi irsini kitabxanalarda təbliğ etmək məqsədilə müxtəlif kütləvi tədbir formalarının həyata keçirilməsinə dair tövsiyələr, kitabxananın bu mövzuya dair tərtib etdiyi onlayn materialların keçidləri və ədəbiyyat siyahısı təqdim edilib.

Virtual kitab sərgisində Nəriman Həsənzadənin VII cilddə nəşr edilən “Seçilmiş əsərləri”, “İllər, pillələr, talelər”, “Poylu-beşiyim mənim”, rus dilində çap edilən “Nabat xalanın çörəyi”, “Mən sizinləyəm”, “Azərbaycan poeziyası” kimi kitabların, Nəriman Həsənzadənin yaradıcılığı haqqında qələmə alınan “Şerimizin Nərimanı”, “Nizami Gəncəviyə Nəriman Həsənzadə baxışı”, “Fərdilik və fərqlilik”, “Nəriman Həsənzadənin dramaturgiyası” kimi dövrü mətbuat nümunələrinin və Xalq şairinin müsahibələrinin tam mətni sərgilənib.

Virtual kitab sərgisi kitabxananın rəsmi saytında https://www.ryl.az/multimedia/neriman-hesenzade-95 yerləşdirilib.

• III Kəlağayı Festivalı təşkil olundu
• Azərbaycanlı rejissor beynəlxalq mükafata layiq görüldü
• “Ləzginka” rəqs ansamblı Bakıda konsert proqramı ilə çıxış etdi