“Beynəlxalq Türk Mədəniyyəti Təşkilatının (TÜRKSOY) təsis etdiyi “Beynəlxalq teatr” mükafatının “Türk dünyasının ən yaxşı teatr aktyoru” nominasiyası üzrə mənim seçilməyimlə bağlı bir neçə gün əvvəl xəbəri aldım. Düzünü desəm, bu, mənim üçün gözlənilməz oldu. Çünki artıq tam başqa bir ovqatla yaşadığım yaşdayam. Lakin çox sevindim”.

Kulis.az xəbər verir ki, bu sözləri "AzərTac"a müsahibəsində Xalq artisti Fəxrəddin Manafov deyib. O, hər bir yaradıcı insan üçün istər hansısa mükafat və ya adi bir sözün böyük əhəmiyyət kəsb etdiyini vurğulayıb:

“İnsan dünya qurulduğu andan yaşayır və Ulu Tanrı bizə saysız seçimlər verir. Hər bir insan isə bəlkə də özünün şüuraltında olan istiqaməti seçir. Mən də bu istiqaməti seçdim. Nədənsə, bilmirəm, bir səhər gözümü açdım və gördüm ki, bu sənət məni öz arxasınca apardı və ağuşuna aldı. Sənətim yeganə yerdir ki, harada mən öz narahatlığımı, sevgimi, nifrətimi, ağrımı, düşüncələrimi, ümumiyyətlə insana xas bütün hisslərimi tapa bilirəm. İncəsənət təsəllimi tapdığım, özümü dünyanın bir parçası hiss etdiyim yerdir”.

Fəxrəddin Manafov hansı sənəti seçməsindən asılı olmayaraq insanın yaratdığını və bunun bizi yaşatdığına inandığını deyib.

• Daniel Kreyq yenə detektiv oldu
• “Muğam saatı” səs performansı keçirilib
• Azərbaycanlıların “plyonkalı maşın” ehtirası - İkinci Mahmud