Azərbaycan Dövlət Gənc Tamaşaçılar Teatrında yazıçı Ülviyyə Heydərovanın “İnanıram” monopyesi əsasında səhnələşdirilən eyniadlı monotamaşa nümayiş olunacaq.

Kulis.az xəbər verir ki, yanvarın 21-də təqdim ediləcək tamaşanın quruluşçu rejissoru və səhnə tərtibatçısı Elşad Rəhimzadə, musiqi tərtibatçısı Aygül Quliyeva, rejissor assistenti Sona Mustafayevadır. Monotamaşada aktrisa Zemfira Əbdülsəmədova çıxış edəcək.

Qadın bir dağ kəndində arxeoloji ekspedisiyada iştirak edərkən yamacda tək bir ağac görür. Gənc arxeoloq bu ağacın kölgəsində oturarkən ana olacağını öyrənir. Məhz bu məqamdan sonra qadınla ağac arasında mənəvi bağ yaranır. Qadın müharibə səbəbindən arxeoloji qazıntı ərazisindən uzaq düşür. Həmişə arzulayır ki, işğal altında qalan dağ yamacındakı bu ağacı oğluna göstərə bilsin. İllər sonra qadının oğlu həmin ərazini işğaldan azad edərkən anasının haqqında çox bəhs etdiyi həmin ağacı tanımadan şəhid olur. Artıq qadının bu dünyada, sadəcə, bir sığınacağı var – yamacdakı tək ağac. Son dəfə ağacı görmək və məhz burada intihar etmək üçün qadın işğaldan azad olunmuş yamaca qayıdır...

Səhnə əsəri Vətən sevgisini bütün sevgilərdən daha üstün tutan şəhidlərimizə və onların analarına həsr olunub.

• Qırx il uzaqdan tanıdığım Adam - Nəriman Əbdülrəhmanlı
• Salam Sarvan poeziyasında sözün rəqsi və zamanın palitrası - Elmir Həsən
• Xəzər Universitetində elmi-metodik jurnal təqdimatı - Fotolar