Beynəlxalq Türk Mədəniyyəti və İrsi Fondunun prezidenti Günay Əfəndiyeva Litva Respublikasına rəsmi səfər edib.

Kulis.az xəbər verir ki, səfər çərçivəsində Litva Respublikasının Prezidentinin təhsil, elm və mədəniyyət sahələri üzrə müşaviri Vilma Backiute və Xarici İşlər nazirinin müavini Jonas Survila ilə görüşlər keçirib.

Görüşlərdə Beynəlxalq Türk Mədəniyyəti və İrsi Fondu və Litva Respublikası arasında imzalanmış Əməkdaşlıq Memorandumunun əsasında qarşılıqlı iş birliyinin uğurla həyata keçirilməsindən söz açılıb. Litvanın ərazisində məskunlaşmış türk etnik kökənli xalqlara - tatarlara və karaimlərə dövlət səviyyəsində göstərilən diqqətin əhəmiyyətindən bəhs olunub. Bu münasibətin bariz nümunəsi kimi Litva Respublikasında 2021-ci ilin “Tatarların tarixi və mədəniyyəti ili”, 2022-ci ilin isə “Karaimlərin tarixi və mədəniyyəti ili” elan olunması vurğulanıb.

Litva Respublikasının Birinci xanımı Diana Nausedienenin, Xarici İşlər naziri Qabrielius Landsberqisin Fondun prezidenti ilə görüşləri xatırlanaraq, təşkilat tərəfindən tatar və karaim illərinin açılışları çərçivəsində təşkil olunan tədbirlərdə iştirakları məmnuniyyətlə qeyd olunub. Fondun digər xarici ölkələrlə, eləcə də Avropa məkanında əməkdaşlıq əlaqələrini günü-gündən genişləndirməsi yüksək dəyərləndirilib.

Görüşlərdə Azərbaycan Respublikasının Litva Respublikasındakı fövqəladə və səlahiyyətli səfiri Tamerlan Qarayev, Litvanın Azərbaycandakı fövqəladə və səlahiyyətli səfiri Egidius Navikas iştirak edib.

Görüşlər Litva ilə təşkilata üzv olan türk dövlətləri arasında qarşılıqlı əlaqələrin, eləcə də mədəni mübadilələrin intensivləşdirilməsi yönündə gələcək əməkdaşlığın perspektivlərinin müzakirələri ilə davam edib.

• Xaqani Şirvaniyə həsr olunan elektron məlumat bazası hazırlandı
• Müharibənin dəhşətləri kətan üzərində - "Auvour döyüşü"
• Dostoyevskinin fədakar həyat yoldaşı - Onun hansı taktikası işə yaramışdı?