“Azərbaycan Yazıçılar Birliyindən və AYB Gənclər Şurası üzvlüyündən istefa verdiyimi açıqlayıram”.

Bu sözləri gənc yazar Tural Turan öz sosial şəbəkə hesabında yazıb. T.Turan istefası haqda daha sonra bunları əlavə edib:

“Bu qərarımı AYB rəhbərliyinin yarıtmaz fəaliyyətinə etiraz olaraq qəbul edin. Fəaliyyət sistemi şəffaf olmayan bir qurumda təmsil olunmaq istəmirəm.

Prezidentin ayırdığı pulların hesabatını verə bilməyən, ancaq məhdud sayda və rəhbərlik cameəsinə yaxınlığı ilə seçilən bəlli imzaları xaricdə çap etməklə məşğul olan bir qurumun şəffaf fəaliyyəti ilə bağlı məndə əsaslı şübhələr yaranıb.

Ədəbi fəaliyyətimə, şair olaraq dünyaya çıxışıma heç bir müsbət təsiri görünməyən, varlığı ilə yoxluğu bilinməyən bir qurumda təmsil olunmaq niyyətim yoxdur.

Ancaq öz şəxsi imkanlarımı səfərbər etməklə dünyaya çıxış əldə edəcəyəmsə, AYB üzvlüyünü üzərimdə yamaq kimi daşımaq istəmirəm.

Qurumda təmsil olunan digər həmkarlarıma və AYB sədrliyinə namizədliyini irəli sürmüş Fuad Ceferli və Emil Rasimoğlu əfəndilərə isə mübarizələrində uğurlar arzulayıram.

Mənəvi olaraq yenə də onların yanındayam. Bundan sonra daha böyük hədəflər uğrunda mübarizə aparacağam”.

• "Tütək səsi" bədii filmi nümayiş olunacaq
• Azərbaycanlı şairin kitabı məşhur onlayn kitab mağazasında
• Beynəlxalq Abidələr və Tarixi Yerlər Günü ilə əlaqədar icmal hazırlandı