Kulis.az Nicat Şükürlünün "Biz insanıq yoxsa at?" yazısını təqdim edir.

"Squid Game" serialında Gi-Hun "Biz at deyilik, biz insanıq. İnsanlar..." deyərək etiraz edir. Bəs dünyada nə qədər insan at kimi çapdığının və ya çapıldığının fərqindədir?

Ümumiyyətlə, nə vaxtsa Gi-Hun kimi at deyil, insan olduğumuzu anlayacağıqmı? Çətin. Ona görə çətin deyirəm ki, insan yaradılış məqsədindən artıq geri dönülməyəcək qədər uzaqlaşıb. Bəlkə də şişirtmiş olaram, yüz min insandan biri sözün əsl mənasında yaşayır ya yox.

Filankəs filan yerə getdi, filankəsin toyu belə keçdi, filankəs filan qədər kitab oxudu. Bəs mən? Başlayırıq at kimi çapmağa.

Nəyi var özümüzü çaparaq qan-tərin içində qalırıq, nəfəsimiz kəsilir. Unuduruq ki, məsələn Roma, Paris, Praqada yox, elə ölkə hüdudları içində də istirahət edərək xoşbəxt olmaq mümkündür.

Hələ kredit götürüb səyahət edənlər var...

Günə bir kitab oxunan marafonlar keçirilir. Mənasız bir şeydir. Aya beş-altı yox, iki-üç kitab oxu. Əsas olan yazıçının mesajını tutmaq, anlamaqdır.

Evlənəndə, xoş günündə bir qoşunun iştirak etdiyi məclisdənsə, hovuzun qırağında sənə əziz, doğma olan beş - on insanla toyunu keçirt.

Çəlləkdə yaşayıb uşağın bulaqdan əli ilə su içdiyini görəndə tək istifadə etdiyi əşya olan su qabını artıq sayıb tullayan Diogen ilə kapitalizmin köləsi olmuş dövrümüzün insanları arasında kəskin uçurum yaranmışdır.

Bu dövrün insanı narahatdır. Həmişə nəyəsə gecikdiyi, nəyisə tam etmədiyi düşüncəsi içindədir. Belə olduqda həyat işgəncəyə çevrilir.

Axı nə qədər çapmaq olar? Bu sonu olmayan yarışda insanlar nəfəs dərmək üçün bircə saniyə dayanmırlar.

Əhsən ən möhkəm çapana, çapılana, atdan daha çox ata oxşayana!

• I Beynəlxalq Əskişəhər Porsuk Festivalı başladı - Azərbaycan da iştirak edir
• Əfsanəvi “rok-n-roll kralı” haqqında maraqlı faktlar
• "Sən bilən, qocalar niyə tez dururlar?" - "Qoca və dəniz" əsərindən bir hissə