Ayaq səsimdən gərək biləsən ki, Bəxtiyar gəlir!

Ayaq səsimdən gərək biləsən ki, Bəxtiyar gəlir! - Günün şeiri

16 avqust 2025

09:57

16 avqust Xalq şairi Bəxtiyar Vahabzadənin doğum günüdür.

Kulis.az bu münasibətlə bu gün 100 illiyi qeyd olunan şairin "Gəlir" şeirini təqdim edir.

GƏLİR

Tarıma çəkilmiş simə bənzə sən,
Titrə, bir yarpağın titrəməsindən.
Bil, dənizdə coşan suyun səsindən
Xəzri gəlir, yoxsa gilavar gəlir.

Bir az sıxnaşanda göydə buludlar,
Yavaşca titrəşir yerdə göy otlar,
Onlar da bilir ki, havada çən var,
Sabah yağış gəlir, sabah qar gəlir.

Hər kəsə müyəssər deyildir ancaq
Ürəkdən keçəni gözdən oxumaq.
Qaranquşdan qabaq, torpaqdan qabaq
Gərək biləsən ki, ilk bahar gəlir.

Qəlbim götürməyir bəri-bəzəyi,
Çətindir yamamaq sınmış ürəyi.
Özün dərk edəsən gərək hər şeyi,
Səni başa salmaq mənə ar gəlir.

Baxışdan söz götür, söz anla sözdən,
Həssas ol, sevgilim, ömrün boyu sən.
Əgər sevirsənsə, ayaq səsimdən
Gərək biləsən ki, Bəxtiyar gəlir!

Bəxtiyar Vahabzadə -100 Xalq şairi Gərək biləsən ki Bəxtiyar gəlir

Kulis.az

621 dəfə oxunub

Paylaş