ABŞ-nin məşhur "Real Time" verilişinin aparıcısı Bill Maher cümə günü yayımlanan buraxılışındakı monoloqunun böyük bir hissəsini Prezident Donald Trampın Vaşinqtonda ("National Mall" ərazisində) təşkil etdiyi uğursuz "Freedom 250" (Azadlıq 250) konsert silsiləsinə həsr edib.

Kulis.az xəbər verir ki, Amerika Birləşmiş Ştatlarının 250 illik yubileyinə həsr olunan bu tədbir ciddi etirazlarla və ulduzların kütləvi şəkildə boykotu ilə üzləşib.

Trampın 2017-ci ildəki andiçmə mərasimindən əvvəl baş tutan, "The Piano Guys" və "DJ Ravidrums" kimi az tanınan adların çıxış etdiyi biabırçı konsertində olduğu kimi, bu dəfə də bənzər vəziyyət yaşanıb. Çıxış edəcəyi açıqlanan bir çox sənətçi sonradan layihədə Trampın iştirakından xəbərsiz olduqlarını və aldadıldıqlarını iddia edərək səhnəyə çıxmaqdan imtina ediblər.

Konserti boykot edən ulduzlar

Siyahıdan adlarını çıxaran məşhurlar arasında bu adlar var:

Rok ifaçısı Bret Mayklz (Bret Michaels);

"R&B" qrupu "The Commodores";

Reper "Young MC";

Morris Dey (Morris Day) və "The Time" qrupu;

"Milli Vanilli" qrupunun orijinal müğənniləri.

Kountri musiqi ulduzu Martina Makbrayd isə X hesabında iştirakdan imtina etdiyini bu sözlərlə açıqlayıb:

"Mənə qeyri-siyasi bir tədbirdə çıxış etmək fürsəti təqdim olunmuşdu, ancaq aldadıldığım ortaya çıxdı".

"İşsizlərin qeydinə qalan prezident..."

Bütün bunlara toxunan Bill Maher öz ənənəvi satirik üslubu ilə vəziyyəti belə şərh edib:

"Amerika üçün 250-ci ildönümü ziyafəti keçiririk. Böyük bir konsert! Təşkilatçılar iştirakçıların siyahısını açıqladılar: "Vanilla Ice", "Milli Vanilli", Morris Dey, Bret Mayklz. Məncə, prezidentin bu addımı çox təqdirəlayiqdir – bu, onun işsizlərin qeydinə qaldığını göstərir. Sonra isə belə "ulduzlar keçidi" açıqlandıqdan dərhal sonra, siyahıdakıların bir çoxu, "Xeyr, siz nədən danışırsınız? Biz çıxış etmirik" dedilər. Sən "Milli Vanilli" kimi bir qrupla belə razılaşa bilməyəndə bu adama yəqin ki, çox ağır gələr".

Qeyd edək ki, 25 iyun – 10 iyul tarixləri arasında keçirilməsi planlaşdırılan "Freedom 250" konsert silsiləsində reperlər "Vanilla Ice" və "Flo Rida", eləcə də vaxtilə yalnız fonoqramla oxuması ilə qalmaqal yaradan "Milli Vanilli" üzvü Fab Morvan hələ də çıxış edəcəklərini təsdiqləyiblər.

250 dollarlıq əskinas və pulqabı zarafatı

Maher Trampa qarşı tənqidlərini bununla da yekunlaşdırmayıb. O, ABŞ-nin 250 illiyi şərəfinə Prezidentin şəklinin yeni buraxılacaq 250 dollarlıq əskinasların üzərində yerləşdirilməsi xəbərinə də istehza edib:

"Budur, "biz heç vaxt belə bir ölkə olmamışıq" kateqoriyasından daha bir xəbər: Üzərində Trampın siması olan 250 dollarlıq əskinas buraxırlar. Yəqin ki, bu, xatirə üçündür. Konqresdəki respublikaçılar bundan çox həyəcanlıdırlar. Onu pulqabılarında gəzdirmək üçün tələsirlər. Amma nə qəribə yerdəyişmədir: Trampın üzü onların arxa ciblərində – düz arxalarına bitişik olacaq".

• "Sən də bilmə, Lavinia..." - Özdemir Asaf məşhur şeirini kimə yazmışdı?
• “Onların Mehdisi, bizim Mixaylo” filminin təqdimatı oldu
• Ölümünə həkimlərin bais olduğu Hacıbaba Bağırov kimdir?