Torpaqlarımızı bərpa etdikcə, Ermənistan öz hirs-hikkəsini mülki əhalidən çıxmağa davam edir. Gəncədən sonra Bərdə də faciə baş verdi. Yenə uşaqlar həlak oldu.

Müharibədə əsgər əsgərə qarşı vuruşur, mərdcə şəhid olur, yaxud zəfərə doğru gedir. Azərbaycan ordusu cəbhədə ermənilərin sivil insanlarını bombardman eləmir, əsgərə, orduya güllə atır. Onlarsa, sadə insanları hədəf seçir. Kinolarda, əsərlərdə oxuduğumuz faciələri bu günlərdə öz məmləkətimizdə yaşayırıq.

Sosial şəbəkələrdə böyük bir dükandan raketin qulaq batıran səsini və adamların necə gizləndiyini görürük. Bu insanların günahı nədir? Ay Allah, deyib həyəcanla gözləyirlər. Yaxud da qızının cəsədinə sarılan atanın fəryadı. Bu hansı insanlığa, humanizmə sığır?

Ermənilər dünyanın gözü qarşısında bir daha uşaq qatili olduqlarını göstərdilər. Erməni hakimiyyəti bir daha sübut etdi ki, xalqlarını, toplumlarını uçuruma sürükləyirlər.

Dünya zatən bizə laqeyd qalmaqda davam edir. Guya beynəlxalq sülh təşkilatları var. Kimə, nəyə görə? Dünyada əzəldən ədalətsizliklər, haqsızlıqlar olur. Bərdədə baş verənləri də görməzdən gələcəklər. Necə ki, Xocalıda olanları unutmadıq.

Prezidentin də dediyi kimi, biz bu yolda heç kimin dəstəyini, köməyini gözləmirik. Haqq savaşımız uğrunda döyüşürük.

Bu cür situasiyalarda qurban verən vətəndaşlarımızın doğmalarının yerində olmaq çox çətindir. Heç cürə empatiya qurmaq olmur, imkansızdır. Onların əzabları qarşısında baş əyir, acısını bütün ölkə insanları öz içlərində hiss eləməlidirlər.

Yaşadığım evdə hər gün buludların arasından təyyarə keçir. Gurultulu səsi hər dəfə diksindirir məni. Elə bilirəm ermənilər raket atdı. Bu narahatlığı hər gün yaşayıram. Artıq bu qorxu yuxularıma da gəlir.

Bir dəfə yuxuda evimizə raket atılmasını gördüm. Qızımı, yoldaşımı götürüb evdən qaçmaq istədim. Evimiz dağıldı, daşların arasında qaldıq. Xoşbəxtlikdən qızıma heç nə olmamışdı. Yuxunun içində yaşadığım gərginlik, stress məni real həyata qaytardı. İndi Bərdə də, Gəncə də baş verənləri heç cürə təsəvvür edə bilmirəm.

İnsan bu qədər fəlakətlərə necə hazır ola bilər?

Necə ayıq-sayıq ola bilər?

Tezliklə Qarabağ azad olsun!

Daha uşaqlar ölməsin!

• "Mən Vətənimin imzasını daşıyıram..." - Alman yazıçıdan sitatlar
• Məşhur müğənni könüllü qismində iştirak edib - Xərçənglə mübarizədə
• "Bir şeyi aydın deyə bilmirsənsə, deməli, onu özün də başa düşmürsən..." - Con Syorl