Dekabrın 25-də Azərbaycan Dövlət Akademik Milli Dram Teatrında yazıçı, dramaturq, publisist və ictimai xadim Cəlil Məmmədquluzadənin 150 illik yubileyinə həsr olunmuş tədbir keçirilib.

APA-nın məlumatına görə, tədbirdə Mədəniyyət naziri Əbülfəs Qarayev çıxış edərək bildirib ki, əsası ulu öndər Heydər Əliyev tərəfindən qoyulan siyasət nəticəsində həmişə olduğu kimi böyük, dahi şəxsiyyətlərə xalqımız, dövlətimiz tərəfindən böyük diqqət verilir: "Onun qoyduğu ənənə bu gün də davam etdirilir. Bu il Cənab Prezident İlham Əliyev sərəncamları ilə keçirilən yubileylərin siyahısını tutsaq kifayət qədər maraqlı mənzərə alınar. Bu il Cəfər Cabbarlının, Mikayıl Müşfiqin, İmran Qasımovun, Hüseyn İbrahimovun, İsa Muğannanın, İsmayıl Şıxlının və Məhəmməd Hadinin yübileylərinin dövlət səviyyəsində keçirilməsi ilə bağlı sərəncamlar verilib. Bundan əlavə bütövlükdə "Nəsimi ili" elan olunub. Nəsimi ili ümumiyyətlə mədəniyyət ili kimi qəbul olunmalıdır. Çünki bu tədbirlər silsiləsi Azərbaycan xalqının dili, mədəniyyəti, təfəkkürü ilə birbaşa bağlıdır".

Nazir bütün il müddətində Azərbaycanın müxtəlif bölgələrində C. Məmmədquluzadənin adı ilə bağlı silsilə tədbirlərin keçirilirdiyini diqqətə çatdırıb: "Onun əsərləri əsasında tamaşalar qoyuldu, yeni televizya versiyalarında filmlər çəkildi. Hesab edirəm ki, bu ənənə daim yaşasacaq. Çünki Azərbaycan xalqının özünü dərk etməsində bu cür böyük rol oynamış şəxsiyyətlər heç vaxt unudulmamalıdır. Dövlətin də siyasəti ondan ibarətdir ki, hər dəfə yubileylər keçirildikdə biz sanki bu insanları cəmiyyətimizə, yeni nəslə qaytarırıq və onların bu xalqın inkişafına verdiyi böyük töhfələr bizimlə bir yerdə yaşayaraq gələcəyə keçə bilir".

Azərbaycan Yazıçılar Birliyinin sədri, Xalq yazıçısı Anar C.Məmmədquluzadənin Azərbaycan ədəbiyyatı və mənəviyyatında tamamilə yeni bir səhifə açmış yazıçı olduğunu deyib: "Biz Mirzə Cəlildən öz xalqını necə sevməyi öyrənirik. Bəzən onun haqqında "görkəmli yazıçı" sözünü işlədirlər ki, mən bunun əleyhinəyəm. Çünki indi cavan yazıçılara "dahi yazıçı" deyəndə adam mat qalır ki, bunlar dahidir, Mircə Cəlil görkəmli. Azərbaycan ədəbiyyatında 6-7 şair-yazıçıya dahi demək olarsa, onlardan biri şübhəsiz Cəlil Məmmədquluzadədir. O, Azərbaycan xalqı, Azərbaycan dili yaşadıqca həmişə xalqımızın qəlbində olacaq".

Xalq yazıçısı C.Məmmədquluzadənin Bakıda heykəlinin olmadığını da vurğulayıb: "Bakıda Mirzə Cəlilin ayrıca heykəlinin qoyulması ilə bağlı təklifimi hörmətli prezidentimiz böyük rəğbətlə qarşıladı. Mən arzu edirəm ki, biz o heykəlin açılışında iştirak edək".

Azərbaycan Milli Elmlər Akademiyasının vitse-prezidenti, akademik İsa Həbibbəyli C.Məmmədquluzadəni Azərbaycanın dövlət müstəqilliyinə, milli oyanışına ürəkdən xidmət etmiş görkəmli sənətkar adlandırıb: "O, milli istiqlala ədəbiyyatının sərkərdəsi, böyük "Molla Nəsrəddin" ordusunun başçısıdır. Bu ordu Azərbaycanın milli-mənəvi oyanışına misilsiz xidmət göstərib".

Sonra görkəmli söz ustasının dram əsərləri əsasında hazırlanmış tamaşa-kompazisiya təqdim olunub. Tamaşa-kompazisiyanın rejissoru Xalq artisti Vaqif Əsədov, rejissorları Elnur Məmmədov və Tural Mustafayevdir. Tədbirdə Akademik Milli Dram Teatrının, Gənc Tamaşaçılar Teatrının, Rus Dram Teatrının, Akademik Musiqili Teatrının aktyorları çıxış ediblər.

Qeyd edək ki, 2019-cu il yanvarın 17-də Azərbaycan Respublikasının Prezidenti İlham Əliyev Cəlil Məmmədquluzadənin anadan olmasının 150 illiyinin keçirilməsi məqsədi ilə Sərəncam imzalayıb.

• Şekspirin müəllifliyi ilə bağlı yeni araşdırma tarixə yenidən baxmağa əsas verir
• Azərbaycanlı musiqiçi intihar etdi
• "Oskar" mükafatlı Hollivud ulduzu vəfat etdi