Kulis.az dünyanın ən maraqlı Yeni İl adətləri haqqında materialı təqdim edir.
Yeni il gecəsi evə bərəkət, şans, pul, bolluq və sevgi gətirdiyinə inanılan maraqlı ritüallar dünyanın bir çox ölkəsində geniş yayılıb.
Yeni il ümumilikdə hər kəs üçün yeni başlanğıclar deməkdir.
İnsanlar yeni ilə girərkən qarşılarına məqsədlər qoyur, görüləcək işlər siyahısı hazırlayır, arzularını yazıya alır və yeni ilin daha ümidli və gözəl keçməsi üçün müxtəlif ayinlər icra edirlər.
Yeni il ritüalları ölkədən ölkəyə fərqlənsə də, hamısının əsas məqsədi eynidir: bolluq, bərəkət və xoşbəxtlik cəlb etmək.
Nar qırmaq
Nar qırmaq bir çox ölkələrdə geniş yayılmış bir ritualdır. Türk mədəniyyətində nar hər zaman bolluq və bərəkətin rəmzi sayılır.
Yeni ilə girərkən narın yerə vurularaq qırılması, bərəkətin bütün ilə yayılacağına işarədir. Nar nə qədər çox hissəyə parçalansa və ətrafa yayılsa, ilin bir o qədər bərəkətli olacağına inanılır.
Duz səpmək
Yeni il gecəsi evin qapısının önünə və çiyin arxasına duz səpməyin bərəkət və uğur gətirdiyinə inanılır.
Bu ayin pis enerjini uzaqlaşdırmaq və xoşbəxtliyi cəlb etmək məqsədi daşıyır.
Pəncərədən su atmaq
Puerto Rikoda pəncərədən bir vedrə su atmağın pis ruhları uzaqlaşdırdığına inanılır.
Yaxşı şansı dəvət etmək üçün bəzi ölkələrdə evlərindən çölə şəkər səpirlər.
Balıq yeməyi bişirmək
Balıq yeməyinin yeni ildə uğur gətirdiyi düşünülür.
Balıqlar yalnız irəli doğru üzdükləri üçün, balıq yeməyin insanı yeni ildə irəli aparacağına inanılır.
12 üzüm yemək
Bu ritual İspaniyaya məxsus oolsa da, hazırda dünyanın bir sıra ölkələrində də həyata keçirilir.
Yeni ilə keçid zamanı geri sayımda tam 12 ədəd üzüm yeməyin yeni ilin daha sakit və xoş keçməsinə səbəb olacağı düşünülür.
Hər üzüm dənəsi ilin 12 ayını təmsil edir.
Qapıdan soğan asmaq
Yeni il qapı bəzəmək bir çox ölkədə yayılıb. Lakin Yunanıstanda qapıya soğan asmaq xüsusi məna daşıyır.
Soğan diqqət yetirilməsə belə cücərdiyi üçün bolluq və məhsuldarlığın simvolu sayılır.
Yeni il gecəsi yunan ailələri qapılarına soğan dəstələri asaraq rifahı evlərinə dəvət etdiklərinə inanırlar.
Hətta bəzi ailələrdə valideynlərin səhər uşaqları çöldəki soğanla yüngülcə başlarına vuraraq oyatdıqları deyilir.
Çörək asmaq
İrlandiyada Yeni il günü fərqli bir adət mövcuddur.
Burada insanlar çörəyi divara asaraq yeni ilə yeni bir səhifə açdıqlarına inanırlar.
Sürpriz gizlətmək
Yeni il axşamı süfrəyə verilən son şirniyyatın içinə pul gizlədilir.
Bu pulu tapan şəxsin ili şanslı keçəcək deyə inanılır.
Skandinaviya ölkələrində isə südlü düyü desertinin bir qabında qabığı soyulmuş badam olur.
Badamı tapan insanın həmin il uğurlu olacağı düşünülür.
Paxlalılar yemək
Cənubi Amerikada Yeni il günündə yeyilən yeməklərin böyük əhəmiyyəti var.
Bu bölgədə paxlalı bitkilər yeməyin rifah və bərəkət gətirdiyinə inanılır.
Alış-veriş etmək
Yeni ilə boş soyuducu ilə girməyin pis əlamət olduğu düşünülür.
Buna görə də Yeni il günü ərzaq alış-verişi edib dolabı doldurmaq ilin bolluq içində keçəcəyinə işarə sayılır.
Gecə yarısı piroq yemək
Xüsusilə ABŞ-ın Nyu-Orlean şəhəri ilə əlaqələndirilən “kral piroqu”nun yeyilməsinin Yeni ildə ailəyə zənginlik və rifah gətirdiyinə inanılır.
Alt paltarı seçmək
Bəzi ölkələrdə, xüsusilə Latın Amerikasında, Yeni il gecəsi geyilən alt paltarının rəngi önümüzdəki 12 ayı təsir edir.
Sarı şans, qırmızı sevgi, ağ isə sülh gətirir.
Dəyirmi qidalar yemək
Bəzi mədəniyyətlərdə Yeni il ərəfəsində dairəvi qidalar yemək bolluq rəmzi sayılır.
Filippinlərdə ilin hər ayı üçün 12 dairəvi meyvə yeyilir.
İtaliyada isə sikkəyə bənzədiyi üçün mərcimək yemək adəti mövcuddur.
Saat 00:00-da su krantlarını açmaq
Bəzi inanclara görə, Yeni il gecəsi saat 00:00-da evdəki bütün su kranlarını qısa müddət açmaq bolluq və bərəkət gətirir.
Yeni il ağacına bəzəklər taxmaq
Bəzi mədəniyyətlərdə hər il Yeni il ağacına yeni bir bəzək əlavə edilir və bəzək asılarkən arzu tutulur.
Dənizə girmək
Braziliyada Yeni il gecəsi dənizə girmək və yeddi dalğanın üzərindən tullanaraq hər dalğa üçün arzu tutmaq adəti var.
Boşqab qırmaq
Danimarkada boşqab qırmaq yaxşı əlamət sayılır.
İnsanlar dostlarının və ailələrinin evinin qarşısında köhnə boşqabları qırırlar.
Səhər evin qarşısında nə qədər çox qırıq varsa, bir o qədər şanslı sayılırsınız.
Sevilən insanı öpmək
Bəzi mədəniyyətlərdə gecə yarısı sevdiyiniz bir insanı öpmək vacib sayılır.
Alman folkloruna görə, ilin ilk təmasda olduğunuz insan ilin taleyini müəyyən edir.
Stuldan tullanmaq
Danimarkada insanlar gecə yarısı stulun üzərinə çıxıb yeni ilə “tullanırlar”.
Bunun yaxşı şans gətirdiyi düşünülür.
Qapı və pəncərələri açıq saxlamaq
Qapı və pəncərələri açıq saxlamaq köhnə ilin çıxmasına və yeni ilin maneəsiz daxil olmasına imkan verdiyinə inanılan qədim bir inancdır.
Zeytun budağı yandırmaq
Bəzi mədəniyyətlərdə Yeni il gecəsi evdə zeytun budağı yandırılıb tütsü kimi gəzdirilir.
Bununla evin yeni il öncəsi mənfi enerjidən təmizləndiyinə inanılır.
***
Yeni il hər birimiz üçün yeni ümidlər, təzə başlanğıclar və gözəl imkanlar deməkdir. Arxada qoyduğumuz ilin bütün çətinliklərini geridə buraxaraq, qarşıdan gələn ili sevinc, sağlamlıq və uğurla qarşılamaq arzusu ilə yaşayırıq.
Yeni il həyatınıza bolluq və bərəkət, evinizə huzur və istilik, qəlbinizə isə sevgi və inam gətirsin. Arzularınızın gerçəkləşdiyi, zəhmətinizin qarşılığını aldığınız, xoş sürprizlərlə dolu bir il olsun.
Hər yeni gün sizə ümid versin, hər addımınız sizi daha gözəl sabaha aparsın.
Yeni ildə ailənizlə birlikdə sağlam, xoşbəxt və dinc günlər keçirməyinizi, sevdiklərinizlə paylaşacağınız çoxlu unudulmaz anlar yaşamağınızı arzulayırıq.
Yeni iliniz mübarək olsun!
