Türkiyədə daha bir kitaba qadağa qoyuldu

Ədəbi tənqid

Ana səhifə
Ədəbi tənqid

Türkiyədə daha bir kitaba qadağa qoyuldu - SENZURA

2 may 2011

12:27

İstanbul prokurorluğu tanınmış amerikalı yazıçısı, keçən əsrin ortalarında geniş yayılan “Beat generation” (yorulmuş, əzilmiş nəsil) hərəkatının nümayəndələrindən biri Uilyam Berrouzun “Yumşaq maşın” kitabını qadağan edib.

Prokurorluğun fikrincə, roman insan mənəviyyatını təhqir edir, ictimai normaları pozur.

Kulis.az-ın “Hurriyyet Daily News” saytına istinadən verdiyi xəbərə görə, əsəri tərcümə edən nəşriyyat məhkəmənin qərarını “biabırçı” adlandırıb.

İttihamçılar isə öz növbəsində romanın qüsurlarını sadalayıblar. Onlara görə, romanda vahid struktur və süjet yoxdur, söyüşlərdən, ədəbsiz ifadələrdən geniş istifadə olunub.

İstanbul prokuroru Aykut Çingiz Engin əsəri vulqarlıqda ittiham edib. Onun sözlərinə görə, bu ümumiyyəltə ədəbiyyat deyil və oxucuya yaxşı heç nə vermir.

Qərara etiraz edən nəşriyyat nümayəndələri isə ədaləti bərqərar etmək üçün bütün vasitələrdən istifadə edəcəklərini deyiblər.
Xatırladaq ki, Berrouz sağlığında da senzura ilə qarşılaşıb.

Onun “Çılpaq qəhvəaltı” əsəri yazılandan ancaq bir neçə il sonra Fransada çap oluna bilib.

Amerikada isə yalnız 1962-ci ildə nəşr olunub və “ictimai normaları təhqir” ittihamı ilə məhkəməyə verilib.

Qeyd edək ki, Berrouzun yaradıcılığı bir neçə musiqi, ədəbiyyat və kino nəslinə böyük təsir edib.

Rəna Nevzat