“Sovetdənqalma, sosialist məzmunlu, arabesk xarakterli "hepimiz kardeşiz" şəklində mükafatlar artıq bütün dünyada gülüş obyektidir”

Kulis.az xəbər verir ki, tanınmış şair Qismət Rüstəmov Mədəniyyət Nazirliyinin keçirdiyi ədəbiyyat müsabiqəsini tənqid edib. O, artıq bu cür müsabiqələrin formatının dəyişilməli olduğunu qeyd edib:

“Niyə ədəbiyyat mükafatlarının formatı dəyişmir? Mədəniyyət Nazirliyinin "Vətənpərvərlik mövsuzunda ədəbiyyat müsabiqəsi"nin qalibləri açıqlanıb. Bütün müəllifləri təbrik edirəm, xeyirliyə xərcləsinlər. Məni yenə də işin formatı maraqlandırır, dəfələrlə yazmışam, sovetdənqalma, sosialist məzmunlu, arabesk xarakterli "hepimiz kardeşiz" şəklində mükafatlar artıq bütün dünyada gülüş obyektidir. Bu nə deməkdir axı: Üç nəfər birinci yer! Dörd nəfər dördüncü yer! On nəfər onuncu yer! Mədəniyyət Nazirliyi gərək yalnız bir qalibi olan, yaxşı mükafat fondu olan mükafatlar təsis etsin. Müəllifləri, əsərləri cəmiyyətə təqdim etməyin ən effektiv yollarından biri budur. Baxın, "Buker" mükafatına, hər il bir müəllifin bir kitabının adı bütün dünya ilə bir olur, müəllif həm yaxşı pul mükafatı qazandığı üçün növbəti yaradıcı işlərinə köklənə bilir, həm qalib gəlmiş kitabın satışı artır, həm də dünyanın hər yerində həmin kitabın müəllif hüquqlarını almaq üçün təkliflər gəlməyə başlayır.

Bu, sadə həqiqətdir: hamını qalib elan etmək, heç kimi seçməməkdir, heç kimi seçməmək isə hamıya muncuq paylamaqdır.”

• Ərindən sifilisə yoluxan danimarkalı yazıçı - Nobel komitəsi onun haqqında nə açıqlamışdı?
• "Böyüyün əzəməti balacaları əzmədən yaşamağındadır..." - "Müasir Homer" adlandırılan yazıçı
• "Dost olmasa bu yerlərin nə dadı?" - Sabir Rüstəmxanlıdan Musa Yaqubun anım gününə