Ölkəmizdə yaşı yüzdən çox olan pensiyaçıların sayı açıqlandı: 400 nəfər.

Maraqlısı isə odur ki, bu 400 nəfərin yalnız 27-si kişilər, 373-ü qadınlardı. Fərq çox böyükdür, fantastikdir və belə fərqin təsadüfi olduğunu demək olmaz.

Fakt budur ki, bütün dünya üzrə qadınlar kişilərdən daha çox yaşayır. Buna Ümumdünya Səhiyyə Təşkilatının statistik göstəricilərindən də əmin ola bilərsiniz.

Yaxşı, bəs qadınların kişilərdən daha uzun ömürlü olmasının səbəbi nədir?

Mütəxəssislər buna fərqli səbəblər göstərirlər: genetika, hormonlar, rüşeymlər, iş, həyat tərzi və s.

Amma belə görürəm ki, heç kim həqiqəti demək istəmir.

Hətta elm də qadınlara sözün düzünü deyib onları qəzəbləndirməkdən qorxur.

Mən isə qorxmuram və əslində hamımızın bildiyi həqiqəti deyəcəm.

Kişilərin daha az yaşamağının, daha doğrusu, tez ölməyinin ən əsas səbəbi qadın deyingənliyidir. Hətta əminəm ki, 100 yaşı keçən o 27 kişi pensiyaçının ən azı 80-90 faizi həyat yoldaşını erkən itirib və sonra bir də evlənməyib.

Məşhur fransız yazar Madam De Stallın “Mən xoşbəxtəm ki, kişi deyiləm...” sözləri ilə başlayan fikri yadıma düşür. Madam, De Stall həmin fikrini bu cür tamamlayır: “...Yoxsa bir qadınla evlənməli olardım.”

Məncə, bu, bir qadının edə biləcəyi ən böyük etirafdır.

Əlbəttə, bizim xanımlar, xüsusən də feminist olduğunu iddia edən xanımlar, heç vaxt belə bir etiraf etməzlər. Eybi yox, bunu etiraf etməsələr də onların da həqiqəti bildiyinə əminəm.

Hətta fikir versəniz, çox vaxt xanımlar özləri də bu xasiyyətlərinə lağ edirlər, gülürlər.

Başa düşmürlər ki, iş zarafatdan keçib və çox ciddiləşib, adamlar ölür... ölür...

Dağ kimi kişilər deyingən qadınların çənəsi altından sağ çıxa bilmir.

Kimsə artıq kişilərə qarşı bu şiddətə dayan deməlidir!

Bu mənəvi və elə fiziki təcavüzə son qoyulmalıdır, yoxsa, belə davam etsə, kişilər heç 50-ni də keçə bilməyəcəklər.

• Tupakın qətlində təqsirləndirilən qanqsterə ömürlük həbs cəzası verildi
• "İstiqlal söhbətləri" - düşüncə ehtirası və alim qüruru - Elnarə Akimova
• Tbilisidə Heydər Əliyevin büstü zədələndi - Ermənistan vətəndaşı saxlanıldı